Vawiin chawhma dar 10:30 khan Pu P.C. Lalthanliana, LAD & Social Welfare Minister chuan Mizo Upa Pawl, Zotlang Unit Anniversary vawi 39 na, Upa J.T. Kima In, Zotlang Lungleia lawmna programme chu khuallian niin hmanpui a, kum lam upa te hi an hlu a, kan chawimawi thiam zel a pawimawh a ni, a ti.

Khuallian Pu P.C. Lalthanliana, LAD & Social Welfare Minister chuan kum lama upa te hi sawrkar ang pawhin duhsak em em mah ila kawng tam takah sum lam harsatna kan nei a, a theih chin chinah chuan an tan hma lain, tar pension pawh kan pe ve thin a ni, a ti. Upa te hi Kohhran leh khawtlang bakah ram pawh hian kan mamawh a, an hlutna hi kan hre chho zel dawn a ni, a ti.

Sawrkarna kan chan hnuin FCI lamin buhfai man vawi 8 a tisang tawh a, chutiang anih lai chuan hun rei tak chhung sawrkarin thla tin cheng Vaibelchhe 10 chawi belhin mipuiah Ration buhfai sem chhuah a ni a, tunhnaiah 1kg Rs 15/-ah tihsan a nih thu leh mipui ten sawrkar tan kan tih ve theih tawk kan tih laiin sawrkar pawh hian kan ram sum leh pai dinhmun siamthat kan tum a ni, a ti.

Central sawrkar-ah 14th Finance Commission hman a ni dawn a, hei hi Mizoram tan chuan a vanneih thlak dawn hle a, India ram State zingah kan chanvo theuh tur atanga kan sum hmuh tura a punna sang ber zinga pathumna kan nih thu a sawi.

Minister chuan sawrkarin NLUP a kalpui mek pawh sum awm sa a ni a, kalpui chhunzawm zel kan tum a ni, a ti bawk.

Vawiina Mizo Upa Pawl, Zotlang Unit Anniversary vawi 39 a tlinna lawmna hun hi Rev. B. Thangchina’n a kaihruai a, Mizo Upa Pawl, Zotlang Unit-ah hian member Mipa 84 leh Hmeichhia 109, an zavaiin mi 193 an awm mek a, Pu P.C. Lalthanliana hian MUP Zotlang Unit te hnenah hian Dekchi lian pahnih leh No Dozen 4 a hlan nghal a ni.