Nimin khan DM&R Minister Pu C.Ngunlianchunga chuan Reiek Tlawng lui kam, Maubawk ram chhungah tuitla zawnga feh chhuak thin mitlawmngaite riakbuk leh chawchhumna atana ruahman, hulhliap chu a hawng a. He venbuk hi DM&R sum an dawn atanga sa pumtu Maubawk Branch YMA hian 'Venbuk Thlam' tiin a hming a phuah a ni.

Bialtu MLA Pu Vanlalzawma, Pu Lalrinliana Sailo, MLA, Pu C.T. Zakhuma, Chairman, AMC leh Official ten tawiawm in CYMA Office bearers, CYMA CEC member-te, CYMA Disater Management Committee leh Maubawk Branch YMA ten a hmun ah an lo dawngsawng a. Venbuk Thlam hawnna inkhawm ah hian Pu Vanneihthanga, Journalist, LPS leh Social Media Facebook a Group lar tak enkawltu chu Journalism, vantlang tan leh hnam inpumkhatna atana thawk hlawk an tih avangin Maubawk Branch YMA chuan an chawimawi a ni.

DM&R Minister Pu C. Ngunlianchunga chuan sum tlem te chunga rinawm taka hna hnathawktu leh hawntlaka in satu Maubawk Branch YMA chuan YMA a chawimawi a ni a ti a. Tuitla vanduaina tawk chhanchhuahna ah leh tuitla ruang zawnna ah Tlawng kam a ram zim te mai neitu Maubawk Branch YMA thawhrim zia leh inpekna nasat zia hi Mizoram khawtlang leh a chhunga cheng thalai zawng zawng ten hria se entawn bawk se a duh thu a sawi a. Tuitla chhanchhuah, lirnghing in a tihchhiat seng hawi emaw leimin vanga buaina a lo thlen chang pawn chhanchhuah hna lo 'trained' ngei tawh te chu an thawk hlawk tih Laipuitlang Vanduaina avangin Mizoram in a hre tawh a ni a ti a. Mizoram ah chuan harsatna leh rikrum thil ah pawh penchhuak hmasa ber thin (first responder) chu YMA leh tlawmngai pawl dang te an nih avangin heng pawl pawimawh tak hi DM&R chuan disaster management training pek chhunzawm zel a duh a ni a ti. Maubawk Branch YMA in 'ngar' thlunna ban pahnih luikam tawn tawn a an phun hi thlak ngaia an hriat thu an tarlan chu Minister hian hmalak pui a tiam a. Ngar ban siam nan hian Rs. 1,25,000/- sanction a nih theih nan Sawrkar in hma a la ang a ti.

MLA pahnih te, AMC Chairman leh CYMA hotute aiawhin Pu J. Lalsailova, Treasurer, CYMA pawh Venbuk Thlam hawnna ah hian thusawina hun pek a ni a. Tlawmngai lanu leh valrual feh chhuak te tawm hulna tur sak a nih chu lawmawm an tih thu sawiin he hunah mi chhuanawm tak chawimawi tlak Pu Vanneihthanga, Maubawk YMA ten chawimawina chang an hria chu an bengvar in fakawm an ti hle a ni. CYMA hotute chuan Mizo te hian tunlaiin Mizoramah sawisel phu sel ngam an ni lo mai thin leh chawimawi phu hliah hliah kan chawimawi ngam thin ta lo chu in enfiah ngaih tawh takzet in an sawi a ni. CYMA aiawh a thusawitu hian chhanchhuah hna thawh mek lai leh vanduaina tawk an lo awm in chhanchhuah hna thawh ti harsa khawp in thlirtu an tam thin chu Mizo mipuite insiamthat ngai lai nia a hriat thu a sawi bawk a ni.

Venbuk Thlam hi Tlawng lui kam PHE pump house Gate atanga lui dung zawh thlak zel in 1.260 Km a hla ah sak a ni a. A sakna hmun hma hi, 'Damli Kam' tih a ni a, a sir a tlawng li lian tak, Dam-li ah hian Tlawng lei chhehvel leh a hnar lamah tuitla, vanduaina tawk an awm a piangin 'Ngar' an lo dawh/zar ziah na hmun a ni. Maubawk Branch YMA in a chhinchhiah chinah kum 1973 leh 2013 inkar ah khan Reiek kai Tlawng lui ah tuitla mi 21 ngawt an awm tawh thu leh heng tuitla zinga 12 te hi Venbuk Thlam sakna zawn Damli ah hmuh an nih thu a tarlang.

Venbuk Thlam sa tur hian Maubawk YMA member-te hi vawi tam tak an hnatlang thin a, insakna tur chak leh bungrua te hi fehkawng chhengchhe tak zawh in chhip leh koki a phurh thlen vek a ni a. Inchung zawl nena hman theih tur a siam leh choka awmna 12X24 feet a zau, Venbuk sak nan hian Maubawk Branch YMA chuan DM&R tanpuina a dawn Rs 6,71,000/- an hman zawk vek bakah an pawl sum Rs.19,000/- an thawh belh a ni. Maubawk Branch YMA chuan Venbuk Thlam chu an sak ni mahse Zoram thalai, mitlawmngai apiang te ta a ni an ti a. Tlawng Lei leh a chhehvel a ransa leh lui a cheng nungcha zawng zawng an humhalh thu sawiin Tlawnglui kam ah Picnic Spot tam tak a awm chu a him tawk lova an hriat thu an sawi a. Heng picnic spot neitu te hian bawlhhlawh luiah an paih mai thin chu tha lo an tih thu sawiin an sakna hmunhma leh bawlhhlawh paih dan hi Environment & Forest leh Sanitation thuneitu-te emaw sawrkar a thuneitu ten endik se an duhthu an sawi a ni.