Ni 28.2.2015(Inrinni) khan Mizoram Science Centre, Berawtlang ami chu Planning Secretary Dr. C. Vanramsanga’n National Science Day denchhenin a tlawh. Planning Secretary hian Science Centre-a Gallery hrang hrang te a fan kual hnuin Innovation Hub leh Planetarium sakna tur a hmunah thlirin, Science Centre tihhmasawn zel dan turte a enpui.Ram hmasawn nan Science thiamna hman tangkai a tul thu sawiin Mizoram sawrkarin hmasawnna tur kawng hrang hrangah science thiamna a tangkai thei ang bera hman a tul thu sawiin, remote sensing leh GIS chu MIRSAC hma laknain kawng hrang hrangah hman a nih tawh thu leh hmasawnna tluantling nei tura hman chhunzawm zel a pawimawh thu a sawi bawk. He hun hi Science and Technology Chief Scientific Officer kal chhuak ta Dr. Vanlalzara leh a hmun awhtu Dr. R. K Lallianthanga te, Science & Technology hnuaia thawktuten an tawiawm bawk a ni. Kum 2015 National Science Day thupui ’Science - Ram leh hnam din chhuahna’ tih a ni.

Inkhawm tawite buatsaihah Science Centre-a Scientific Officer Pu Aldrin Malsawmtluanga’n Science Centre hmalakna hrang hrang leh hmathlir te a lem nena entirin a sawi fiah a. July ni 26, 2003-a Science Centre hawn a nih atanga kum 2014 chhung khan mi 2, 57,024-in Science centre hi an tlawh tawh a, chung zinga 1,05,808 chu zirlai naupang niin 14,688 chu zirtirtu an ni.