3575/2022-2023
Aizawl, 14.02.2023: Chief Minister Pu Zoramthanga chuan vawiin khan Airtel 5G Plus Services chu a tlangzarh. He programme, CM office conference hall a neih hi Airtel Mizoram buatsaih niin, ICT Minister Pu Robert Romawia chu khualzahawm a ni.

Chief Minister chuan Airtel in 5G Plus Service an tlangzarh thei ta chu lawmawm tiin, mipui tan tangkaina tam tak a thlen ngei a rin thu a sawi a. Mizoram chu tlangram a awm a nih avanga inkalpawhna kawng pawh tihhmasawn la ngai zel, a panna kawng pawh a thui avanga ei leh bara hmasawnna pawh duhthusam a chak theilo a nih laiin, digital age a kan awm chhawr tangkaia, hmun leh hmuna in awmchilh ngei kherlo in, internet kaltlanga thil tih theih tangkai tak tak a awm ta zel chu malsawmna a nih thu a sawi a. Internet speed chak zawk chuan healthcare ah te, agriculture ah te, education leh service sector ah tangkai taka hman a nih ngei a beisei thu a sawi a. Mizoram pum a 5G coverage a awm thuai theih nan Bharti Airtel chuan hma an lak a beisei thu a sawi bawk.

Information & Communication Technology Minister Pu Robert Romawia Royte pawhin thu sawiin, 5G service chuan inrelbawlna leh khawtlang nunah eng kawng emaw taka hmasawnna a thlen a beisei thu a sawi a. Bharti Airtel chuan mipui mamawh service tha tak an pek zel a beisei thu sawi pahin Minister chuan Corporate Social Responsibility kaltlangin khawtlang mamawh phuhruk theihna tur awm te a sawipui nghal bawk.

Chief Secretary Dr. Renu Sharma pawhin thu sawiin, thlaleh lawka Mizoramin a hmachhawn tur G20 meeting pakhat B20 chu ramchhung chuah nilo khawvel pum huap thil a nih avangin, hemi hunchhung hi chuan delegates lo kalte tan inbiakpawhna lamah harsatna a awmloh nan telecom service provider ten theihtawp an chhuah ve a beisei thu a sawi.

He meetingah hian NESA, Airtel CEO Pu Rajnash Verma chuan kalkahwmte lawmna thu sawiin Airtel hi India hmarchhak a 5G service bultan hmasa bertu a nih thu a sawi a. 5G service chu a tahtawl te tein kalpui a nih chhoh tur thu a sawi a. Vawiin atang Zarkawt, Tuikual - North Bawngkawn, New Capital Khatla, Durtlang, Zemabawk, Luangmual, etc. ah 5G hman theihna device (phone, tablet) ah chuan sum chawi belh ngai lovin 5G network a zawm theih dawn a ni.

Vawiin programmme-ah hian MLA Dr. ZR Thiamsanga, Pu C. Lalmuanpuia leh Pu K. Laldawngliana bakah Youth Affairs and Tourism Board Vice-Chairman Pu TC Pachhunga te an tel a. ICT leh telecom service provider te atangin hotute an tel bawk a ni.