Mizorama Cricket Stadium puitling awmchhun, Sihhmuia Aizawl Cricket Stadium chu vawiin khan Chief Minister Pu Lal Thanhawla chuan a hawng. Stadium sak hna buaipuitu Mizoram State Sports Council hian Cricket Association of Mizoram (CAM) hnenah an hlan nghal a ni.

Chief Minister chuan Mizoramin Cricket Stadium puitling kan nei thei ta hi thahnemngai taka hmalatute thawhrimna rah a ni a ti a. Hmalaknaa sorkar a pen luh ve hma pawhin thui tak an lo kalpui tawhna chu fak tlak a ni a ti a. Tumruhna kan neih phawt chuan engkim hi a tih theih a ni tih a tilang chiang hle a ni a ti.Board of Cricket Control of India (BCCI) a in affilliate tur hian stadium puitling neih hmasak phawt a tul a, hemi nei thei tura F.Lalrotluanga’n s/o Suaka (L)a ram zau tak stadium atan a pe chu a kawng hawngtu a ni a, a ropui hle a ni a ti a. Tunah hian BCCI chhungkuaah harsatna an neih avangin affilliation ala tih puitlin theih rih loh thu a sawi bawk a. Chief Minister chuan thalaite tan khawvel thar buatsaih hi khawvel ina a mamawh ber pakhat a ni a ti a. Sports and Games hi eizawnna leh hausakna mai nilovin, kan thlarau thlenga min chawikang tu a ni tiin, zirlaite hnenah abikin cricket hi Mizoramah chawilar anih theihna turin Education Department pawhin hemi lamah hma la se tiin a ngen bawk a ni.

Chief Minister Pu Lal Thanhawla chuan Stadium hi CAM kuta hlan anih atang hian Suaka Cricket Stadium tia hriat anih tawh tur thu a sawi bawk a ni.

Khualzahawm Pu Zodintluanga, Minister for Sports etc. chuan Mizoram tan vawiin hi ni chhinchhiah tlak a ni a ti a.Thalai ten an talent an phochhuah theihna turin khawvel thar siam turin hmalaknate a rawn puitling chho mek a ni a ti a. Hemi kawnga Chief Minister hmalakna hi a fakawmin a ropui hle a ni a ti.

Bialtu MLA Pu K.Sangthuama pawhin thusawiin India rama game lar ber kan khelh theihna tura cricket stadium puitling kan nei ta chu sorkar chungah lawmthu a sawi a, sorkar tawiawm tlat zel turin mipuite a sawm nghal a ni.

Cricket Stadium hawn tak hi Mizoram State Sports Council-in a puitlin theihna tura hma lain, DONER Ministry ah Aizawl Cricket Stadium tia DPR siam angaih avangin chutiang chuan a hming vuah a ni a, non official chuan Suaka Memorial Cricket Stadium tia hriat thin a ni.Stadium siamna tur hian Non Lapsable Pool of Resources (NLCPR) atangin Rs.995.43 lakhs leh State Fund atangin Rs.110.60 lakhs hmuh a ni a - avaiin Rs.1106.03 lakhs. A ground hi 150 m diametre a ni a, cricket Pitch 22m x 20m a zau (8 lane pitch) a siam a ni.Spectator Gallery 4 sak a niin, mi 800 vel thu thei tura ngiah a ni a, Pavillion siam a ni bawk a ni.

Hawnna inkhawm hi Pu R.Lalvena,IAS, Secretary, Sports & Youth Services in kaihruai a, hawnna inkhawm neih zawhah Chief Minister XI leh Sports Minister XI ten Exhibition Match an khel a ni.