Vawiin chawhnu khan School Education Minister Pu H. Rohluna chuan Mizoram Education Inspecting Officers’ Association (MEIOA) inkhawmpui chu SSA Mission Conference Hall, DIET Complex Chaltlang-ah a hmanpui a. He hun hi Parliamentary Secretary Pu Joseph Lalhimpuia pawhin a hmanpui a ni.

Pu H Rohluna chuan Zirna hi mihring leh ram hmasawnna turin a pawimawh ber a tiin Department a thawk zawng zawng tena he mawhphurna hi engtik lai pawhin hria a hna thawh a tul a ni, a ti. School Education Department chu Department lian ber a ni a, peng hrang hrang – Administration, Inspection, Academic/Teaching, Training, Language, Non-Teaching, SSA, RMSA leh a dang dangte awmna niin hengah hian mahni chanvo lam chauh ni lovin midangte hre renga hnathawh a pawimawh hle a ni, a ti. Department hi kan zavaia inthlunkhawmna a nih hriain pumkhat nih tum tlat turin ka chah duh che u, a ni a ti bawk.

Minister chuan amah chu education lama tawnhriat nei zau lo anih thusawiin Zirna kawnga rawngbawlnaah Department-a thawk tawnhriat zau leh tha neite tawiawmnain thil tha tam tak kan ram leh hnam tan kan thawh ngei ka beisei a ni, a ti.

Kumin 2014 HSLC leh HSSLC Result chu nikum aia a tha chu lawmawm a tih thu sawiin Minister chuan hei aia tha zawk nei turin Department-a thawk leh zirtirtute chu an pawimawh hle a ni tiin tha thlah lova tang zel turin a fuih. CCE chungchang sawiin Minister chuan CCE hi naupangte thiam si lova pawl sang kaina mai ni lo a, an zirlaite thiam chiang vek tura rim taka thawhna tur a ni zawk ani tih hi fiah a tul hle a ni, a ti.

He hunah hian Parliamentary Secretary Pu Joseph Lalhimpuia pawhin thusawiin School Education Department chuan zirlai naupangte an enkawl vangin an hna chu rawngbawlna hna ropui nia a ngaih thu a sawi.

MEIOA hi School Education Department hnuaia Inspecting Officer hrang hrang CEO/APHO, SDEO/HPO. DEO/Deputy Director, Joint Director leh Additional Director te intelkhawmna pawl niin member 44 an awm mek. MEIOA President hi Pu K Lalrintluanga, Joint Director, School Education Department chu a ni.

Vawiin MEIOA inkhawmpui hi session hnih a hman niin chawhma session a an Agenda chhawpchuah te an sawiho a, an rorelnaah hian thil pawimawh dangte bakah Mizoram Education Service Rules tihpuitlin chungchang an sawiho a ni.