No.1093/2021-2022

Aizawl the 23rd June, 2021: Chief Minister Pu Zoramthanga chuan vawiin khan a bial Aizawl East-I chhunga VLTF leh LLTF te an duty na hmunah a tlawh. Sihphir, Sihphir Venghlun, Muthi, Muanna Veng, Zuangtui, Thuampui, Falkland, Zemabawk North leh Zemabawk ah te a kal a ni.

Chief Minister chuan COVID-19 hri leng mek laka vengchhung mipui an him theih nana theihtawp chhuah tute chungah lawmthu a sawi a. Indo lai kan ni a, thil awlai ni lo mahse zawi zawiin kan hneh in beisei chungin theih tawp kan chhuah tlang zel a ni, a ti a. Duty te chu harsatna an neih chuan inthlahrung lova sawrkara thlen turin a chah a ni. 

Chief Minister chuan nikum lama COVID-19 hri leng thawh khatna Mizoram in a hmachhawn dan chu sawrkar laipui pawhin a fak thu a sawi a. Tun a thawh hnihna hi hmun dang ang bawkin kan la na zawk a ni tiin, chumi karah chuan tupawh kan inngaihtuahin kan inngaihven tlang a, hri vei enkawlna CCCC kan din thei te hi khawtlang, kohhran leh mipui tanrualna rawn lanchhuahna a nih thu a sawi. 

Task Force report te Chief Minister hian ngaihthlak sakin, a tul anga an hman turin duty te hnenah hian pawisa fai a pek bakah masks, hand sanitizer, PPE kit leh sodium hypochloride solution a pe a. Vawiina veng a tlawh bakah Nausel, Airfield leh Tuirial Veng VLTF te bakah TNT tan a pe bawk a; a vaiin duty te tana sumfai pek hi Rs. 1,20,000 a ni. Chief Minister chuan vawiin vek hian Zarkawt CCCC a tlawh nghal bawk.