No.1094/2021-2022

Dated Khawzawl, the 23rd June, 2021: Khawzawl District Bawrhsap Pu Zothanmawia chuan nimin khan Kawlkulh leh Dulte khuate a tlawh a, National Highway No. 6 kawng laih dan tur duh lohna an lantir chungchangah heng khuaa NGO Coordination Committee-te chu uluk takin kal zel dan tur a sawipui. Khawzawl Bawrhsap hi Pu PC Lalchunglura, Superintendent of Police, Khawzawl District chuan a tawiawm a ni.

Kawlkulh leh Dulte Joint NGOCC te hian ni 21.06.2021 khan Dulte -Kawlkulh bypass kawng lai tur Dhariwal BuildTech Limited (DBL) hnathawk leh khawlte chu kaltlang phal lovin an dang a. Hemi kal zela nimina DC leh SP te’n NGOCC hruaitute an kawmnaah hian DBL mi leh sa hna thawk tur leh an khawlte lo dan chu dan bawhchhiatna a nih thute, dan kalha hmalakna chuan mimal leh pawl chungah nghawng pawi tak a neih theih dante tarlan a ni a. Kawlkulh leh Dulte khawtlang hruaitute chu thawhpuiah an sawm a ni. 

DC kaihhruaia hmalaknain vawiin khan Joint NGO Co-ordination Committee, Kawlkulh leh Dulte-te nen kal zel dan turah a hnuaia mi ang hian inremna siam a ni:

1. Puilo leh Dulte inkar kawng laih hna hi tun dinhmunah chuan tan rih loh tur a ni.

2. Tuichang leh Puilo inkarah chuan a tul angin kawng laih hna hi thawh chhunzawm a ni ang.

3. Hemi hun chhung hian kawng laih nana mamawh bungrua/khawl leh hnathawktu lo lutte chu harsatna awm lovin an kaltlang ang.