1699/2024-2025

Dated Aizawl, the 22nd August, 2024: Vawiin khan Aijal Club R.B McCabe Hall ah Urban Development & Poverty Alleviation Department buatsaihin Aizawl Hmathlir buatsaih a ni a. Chief Minister Pu Lalduhoma chuan he hun hi a telpui. 

Chief Minister chuan, urbanization hi khawvel kalphung pakhat a ni a, World Bank chhut danin kum 2050 ah chuan mihring hmun thuma thena hmun hnih te hi khawpuiah kan cheng tawh dawn a ni. Aizawl pawh a thang chak em em a, hmathlir fel tak neia kan inbuatsaih a ngai hle. Chumi atana UD & PA inbuatsaihna hi a fakawm hle a ni, a ti. Aizawlin bawlhhlawh paihna mumal leh mamawh phuhru zo tak a mamawh dan te, thlanmual intawm a mamawhna te, kea kalna tur tam zawk te, parking-na tur tam zawk te, Market zau leh tha tak a mamawhna te a tarlang a. Kumin kumtir lama central sawrkarin Aizawl chhuah lam leh tlak lam bypass road thawhna tur a rawn sanction hi a hlawhtlin hunah chuan Aizawl khawpuia lirthei tawt lutuk hi a ziaawm hlein a rinawm, a ti bawk. Assam Rifle ram chhuahsan hman dan tur chu zau zawka mipuite nena inrawn thaa a hriat thu leh ICCC hmalakna chu Aizawl enkawlna hmanraw pawimawh tak a nih thu te a tarlang a ni.

Kal khawm te lawmna thusawitu Pu K. Sapdanga, UD&PA Minister chuan, Aizawl Hmathlir chu UD & PA hnathawh tawh te, thawh mek te leh hmachhawp awm te inhrilhhriatna a nih thu a tarlang a. UD & PA Minister hmasa Pu Tawnluia hmalakna fakin a chungah lawmthu a sawi a. A hmalakna tha tak tak te chu kan chhunzawm zel dawn a ni, a ti. An sawmna ngai pawimawha tel zawng zawng te chungah lawmthu a sawi bawk.

Inkhawm hi Pi Zarzokimi, Jt. Secretary, UD & PA chuan a kaihruai a, Dr. Andrew H. Vanlaldika, Director, UD & PA chuan  thupui pahnih: Aizawl khaw chhunga veivahna tha zawk ruahmanna (Aizawl Sustainable Urban Transport Project) - Ropeway/cable car, city bus service changtlung zawk, corridor & junction improvement, skywalks, regional Truck, Bus & Maxi Cab terminals, vertical mobility, multi level off street parking leh Assam Rifles insawn huna ram hman dan tur an ruahmanna te a lem nena entirin sawifiahna a nei a. Aizawl Sustanable Urban Transports Project bik hi Asian Development Bank funding hmanga thawh tura duan a ni.

Pu C.C Lalchuangkima, CEO, Aizawl Smart City chuan thupui pahnih "Aizawl- Khawpui fai" tih leh "Integrated Command & Control Centre (ICCC) hman tangkai dan tur" hmangin thusawina a nei bawk a.

Khawpui faina hmalak meknaah hian Solid Waste Management Centre, Luangmuala sa tura hmalak mek te, Solid Waste Management Centre, Tuirial hmalakna hrang hrang te, Common Biomedical Waste Treatment Facility, Tuirial a sak thar kumin July thlaa hawn tak te, Hualngohmuna Construction & Demolition Waste centre sak mek te, leivung paihna tur ruahmanna te leh an hmalakna dang te a tarlang.

Integrated Command & Control Centre hi Smart City hnuaia Aizawl khawpui chhunga mipui leh lirthei che vel vilna lama hmalakna a ni a. Hmun 76 ah CCTV an dah tawh a, Automatic Number Plate Recognition System hmun 14 ah an dah tawh a, Free Public Wifi hi hmun 15 ah, Environmental Sensors hmun 4 ah, Variable Messaging Display hmun 4 ah, Facial Recognition System hmun 5 ah an bun fel tawh a, garbage truck 160 ah GPS Tracking Devise an vuah tawh a ni. Hmalakna pawimawh tak tak engemawzat an kalpui mek bawk.

Thupui sawituten an sawi lai hian a tul ang zelin Pu Lalmalsawma Pachuau, Secretary, UD&PA kaihhruaiin sawihona neih zel a ni.

Aizawl Hmathlirah hian Minister te Pu K. Sapdanga, Pu Vanlalhlana, Pu Lalthansanga, Pu C. Lalsawivunga, Pu Lalnghinglova Hmar, Pu B. Lalchhanzova leh Pu TBC Lalvenchhunga, Adviser to CM bakah Aizawl khawpui chhung bialtu MLA dang te, Aizawl Mayor, Deputy Mayor leh Corporators te an tel a ni.