599/2025-2026
Aizawl, the14th May 2025: Vawiin khan Chief Minister Pu Lalduhoma chuan a office-ah sawrkarin Aizawl leh a chhehvela lung tla thin zir chiang tura a sawm Er. Manthan Chauhan, Asst. Manager, Maccaferri Geo-technical Solutions Pvt. Ltd leh Dr. C. Sawmliana, Chief Scientist, Council of Scientific & Industrial Research - Central Institute of Mining & Fuel Research (CSIR-CMIR) Central Institute of Mining & Fuel Research (CSIR-CMIR) te a kawm a. Aizawl Bawrhsap Er. Lalhriatpuia hova nimin leh nimin piah lama Aizawl chhehvel hmun pathuma lung tlak theihna hmun an enfiah chungchang a sawipui.
Chief Minister hian, Lengpui kawng Pukpui bul ko hlauhawm siamna tur leh Ngaizel lung tla thin tihnepna leh chhiatna a thlen fo thin pumpelhna tur Detail Project Report tha tak siam ran tha a tih thu a lo hrilh a. Central Institute of Mining & Fuel Research (CSIR-CMIR) te nena tangkawpin, a tul anga IIT lam mithiamte pawh rawnin, DPR phawt hi i tum ang u, tiin an rawtna a taka thawh thuai a nih theih dan tur a lo hrilh.
Mithiamte hian Lengpui road Pukpui bul hi, a ko hi a chhawrdawh (benching) tura hal (blasting) thain an hria a. A chung lama ram neitute pawhin mipui himna atan chuan an ram te hi an pek phal mai an beisei thu an tarlang.
Ngaizela chhiatna a thlen hian kawng chhak lam ko hnaiha lirthei awm leh tlan lai te chungah a thleng deuh zel a. Kawng saw a zau thawkhat nain a thlang lam sirah City Bus dah a nih avangin lirthei kaltlang tur te hian kawng chhak lam hnaiha an tlan a ngai thin a. Hei hi tihdanglam a tul nia a lan thu an tarlang a. Ngaizela lung tla thin venna rintlak tak, khuarei daih ni bawk si siam tur chuan Rs. 90 Crore vel zet a tul dawn niin an ngai. Hlimen lama hmalak dan tur tha nia an hriat pawh an sawiho bawk.
Chief Minister hi Pu Vanlaldina Fanai, Commissioner & Secretary to CM in a tawiawm a ni.
Mithiamte hian chawhma lamah Home Minister Pu K. Sapdanga hmuin an thil hmuh dan report an pe tawh a. Home Minister hian Chief Minister hnena thlen ve turin ruahmanna a lo siamsak a ni.
