598/2025-2026
Lunglei, 2025 Ṭomir thla ni 14: Vawiin khan Lunglei DC Conference Hall-ah District Disaster Management Authority (DDMA) Chairman, District Bawrhsap Pi Navneet Mann hovin Lunglei khawpui chhunga khua leh tuite himna atana êng tihthim dan tur en chhinna (civil defence blackout mock drill) buatsaih tura inbuatsaihna thlir ho niin, hlawhtling taka blackout mock drill buatsaih a nih theih nana thil ṭul hrang hrang sawi ho a ni.
DDMA Chairman Pi Navneet Mann chuan rikrum thila himna atan khua leh tuite'n tih tur leh tih loh tur kan hriat a, a chhe ber a lo thlen pawha chi-ai lo leh felfai taka chet kan lak theih nan inralrin leh inhmakhua a ṭul tih sawiin, tun laiah boruak leh vansang aṭanga hmun hla tak tak beih theihna hmanrua leh ralthuam - drone leh missile ang chi te a awm tawh avangin, chuti ang laka inven dan te pawh chu hriat a pawimawh thu a sawi a. Drone ang chi ralthuam chuan êng lam an tinzawn ṭhin avangin êng tihthim chu a pawimawh thu leh Lunglei khawpui chhunga êng tihthim (blackout) drill buatsaih tur chu mipuite'n urhsun taka zawm a pawimawh thu sawiin, blackout drill hlawhtlinna atan official-te, khawtlang hruaitu leh tlawmngai pawlte, kohhran leh pawl hrang hrangte leh mipuite thlawpna leh thawhpuina a ngen nghal a ni.
Lunglei Superintendent of Police Pu J. Lalmuankima pawhin blackout drill chu India ram pum huap hma lakna a nih avangin leh mipui himna nena inkungkaih tlat a nih avangin nuihzata la mai lo va, tihtak taka kalpui a ṭul thu a sawi a. Minit nga chhung chauh drill chu nakina nunna chhantu a la nih theih avangin mipuite'n ngai pawimawh turin a ngen bawk a ni.
He hunah hian DDMA member-te, sawrkar department hrang hrang hotute, sipai hotute leh zirna in ai awhte an tel a. Van sang aṭanga beihna (air raid) lo thlen thulha ram mipuite himna atana êng tihthim dan tur en chhinna (civil defence blackout mock drill) chu May ni 15, 2025 (Ningani) zanah minit 5 chhung, dar 8:30 - 8:35 inkarah Lunglei Municipal Council (LMC) huam chhung veng 24-ah kalpui tura ruahman a ni a. Zan dar 8:30-ah Power & Electricity Department te'n power an titawp ang a. Veng tinah YMA (Young Mizo Association) information centre kal tlangin minit khat chhung ralkhel dar (siren) tihrik a ni ang a, hemi rual hian mipuite'n inverter, generator leh solar hmanga eng chhit zawng zawng pawh tihthim vek tur a ni ang a. Lirthei tlan laite pawh felfai taka dingin, minit nga chhung chu tihthih vek tur a ni ang. Hemi chhung hian damlohna thil hmanhmawhthlak (medical emergency) a awm a nih chuan phone number 0372-2323635 emaw, Hotline number 1077 emaw hmangin District Emergency Operation Centre (DEOC) biak pawh theih a ni ang. Kohhran, pawl hrang hrang leh mimal programme ruahman sa neite pawh he minit nga chhung hi chuan blackout hi zawm ve tura insiam rem turin ngen an ni.
May ni 15, 2025 chhun lama Lunglei khawpui chhung hmun ṭhenkhata civil defence fire mock drill buatsaih tura ruahman erawh chu hun remchang dangah a ṭul anga la kalpui turin dah rih a ni.
