1049/2022-2023

Aizawl the 25th June, 2022: Chief Minister Pu Zoramthanga chuan vawiin khan Thuampui ah Aizawl North High School building chu hawngin, HSLC Pass Lawmna Programme Thuampui YMA Hall a buatsaih a hmanpui.


Chief Minister chuan sawrkarin zirna ngaihpawimawhin, tihchangtlun zel tum a nih thu a sawi a. Aizawl North High School building thar hawn chu a lawmpui thu sawiin, kumin an Board exam result pawh fakawm a ti a. Zirlai te taimakna bakah zirtirtute inpekna leh nu leh pa te tawiawmna a lantir thu sawiin, result tha tak an neih belh zel a duhsak thu a sawi. Chief Minister chuan thalaite chu zirna kawnga theihtawp an chhuah laiin an nun hloh lo a, inthunun tlat turin a chah a. Tunlaiah chhungkua leh khawtlangah hlimlohna, buaina, khawsak harsatna leh buaina thlentu langsar tak chu zu leh ruihhlo a nih dan sawiin, thalaite chu chung lamah chuan inzuah fihlim tlat turin a chah a. Heng thilte hi Siamtu in kan nih tur a duan ang ni phalo a min dahtu a nih dan a sawi.

Khualzahawm School Education Minister Pu Lalchhandama Ralte chuan Thuampui khawtlang chu zirna an ngaihpawimawh avanga hma an lak dan chu fakawm a tih thu a sawi a. HSLC exam 2022 a pass-te chu a lawmpui thu sawiin, tun hi an bultanna chauh a la ni tih hria in, an kal zelna turah danglam ngam in, theihtapw chhuah a, mahni inthununna nen tumruhna nasa tak nen kal zel turin a chah a ni. Education Minister chuan hripui leng avanga school mumal taka a kal theilo karah board exam hlawhtling taka Mizoram Board in a kalpui thei chu thil ropui tak leh state dangte lakah pawh chhuan tham a nih thu sawiin, mipui leh sawrkar thawhhona zar a nih thu a sawi a. Ram hmasawnna atan education chu lungthu pawimawh tak a nih avangin zirna lama theihtawpa sawrkarin hma a lak zel tur thu a sawi a. Zirna peng hrang hranga hmasawnna bakah hnam ziarang hriatchianna leh mahni nihna a nghet tlat a kan awm a pawimawh thu sawi bawkin, chumi atan chuan elementary level a subject thar "Zonun" chu dah a nih thu a sawi bawk.

Aizawl North High School building vawiina hawn tak hi March ni 24, 2021 khan sak tan niin thla tum chhung vela sak zawh a report a ni a, November ni 1, 2021 khan luah tan a ni. Assam type chhawng khat, 24x45 feet bial a zau a ni a. A sakna tur hian Fund raising commitee din in Local Council, NGO leh khawtlang mipui atanga vehbur khawn a ni a. Sum sen tawh zat chu cheng 11,23,353 a ni. He High School hi a hma in Bawngkawn Chhim Veng a awm thin niin, chumi hnuah Chaltlang Ruam Vengah sawn a ni.

Vawiin programme, Thuampui Local Council buatsaih hi an Chairman Pu V. Lallungmuana chuan kaihruaiin, Secretary atangin leh Aizawl North High School Headmaster hnen atangin report ngaihthlak a ni a. Zirlai Pass te lawmpuina leh zirtirtute chubg lawmthu sawina citation pek niin, Local Council Vice Chairman chuan lawmthu sawiin hun a khar a ni.

Attachment

  • Loading attachment...