1050/2022-2023

Siaha the 25th June, 2022: Vawiin khan Siaha Addl. Deputy Commissioner Pu Donny Lalruatsanga’n NH-54 (Zero to Tipa) kawng laih hnathawh mek chu hnathawktu company hotute nen a hmunah kal in an enfiah.


Addl. DC hi Company hotute leh NH-54 Package 8 a (Zero to Tipa inkara) khaw hrang hrang khawtlang hruaitute nen inkawmna an nei a, kawng laih hna kal mek in-a Mizoram hmun hrang hranga lui tui a ti bawlhhlawh/nut nasat avangin, NH-54 (Zero-Tipa inkara) kawng laihna leivung paih dan enfiah an nih thu sawiin, leivung chu duh duhna hmuna paih ngawt a thianglo a, a paihna tur hmun en fel hmasaka, chun’g hmun thlan bikah chauh chuan lui tui leh ngaw ti chhelo thei ang bera leivung chu paih tur a ni, a ti.

Hemi chungchangah hian Company hotute pawh meeting neih pui an nih tawh thu tarlangin, meeting-a rel a nih angin company lamin leivung paih chungchangah thurel an zawm leh zawm loh chu District Administration lam atangin enfiah thin tur a nih thu a sawi bawk.

Hemi bakah hian kawng laih hna ina thing phun a tih chhiat te pawh en ho a ni a. Company lam chu a theih ang angin kawngpui sirah thingphun belh (afforestation) chungchangah hma la tura hriattir an ni.

Hmasawnna hna kal mek chuan ngaw/lui/thing leh mau (environment) ti chereu lo thei ang bera kalpui a pawimawh thu hrilhhriat an ni bawk a ni.

Kawng laih/zauh hna hi khawchhunga thawh tan tawh tur a nih avangin NH 54 package hna ina ram a nghawng neitu, zangnadawmna dawng/la tawh te chu insawn chhuah a hun tawh thu hriattir hmasa tura kal an ni thu leh hemi a tan hian hriattirna (notice) tihchhuah thuai a nih tur thu a sawi bawk. Addl. DC chuan mipui hriattirna kawngah khawtlang hruaitute chu thawhpuiah a sawm bawk a ni.

Addl. DC hi Sub-Deputy Commissioner Pu Collin Hlychho bakah NHIDCL Consultant Pu AK Agarwal, NH-54 package 8 (Amobyu V to Tipa) service provider/contractor Bharatiya Infra Projects Ltd. Project Manager Pu S. Majumder leh hotu dangten an tawiawm a, package 8 a khaw awm heng Amobyu V, Amobyu CH, Amobyu B leh Theiva khua-a khawtlang hotute nen inkawmhona neiin hnathawh kal mek te an enfiah nghal bawk a ni.

Attachment

  • Loading attachment...