Chief Minister Pu Lal Thanhawla chuan vawiin chawhnu khan World Bank suma siam Aizawl - Thenzawl - Lunglei kawng chu Melriat field bulah ribbon chepchatin a hawng. Hawnna inkhawm erawh power supply khaihlak vang leh thlipui na tak a tleh avangin programme kallai tih tawp a ni.

Aizawl - Thenzawl - Lunglei kawngpui hi a project pumpui atan hian cheng vaibelchhe 538.401 senral a ni a.He kawng siam tur hian kum 1997 May thla khan Chief Minister Pu Lal Thanhawla chuan hma a la tan a, kum 1998 October thla ah bul tan a ni. Amaherawhchu India leh US inlaichinna a tlakhniam avangin kum 2002 June thla khan hna tak tak tan theih chauh a ni a.A hnathawh hi Phase 2 a thenin, Phase I na ah Kulikawn atanga Buangpui thleng, Kms 100 a thui chu contractor 3, Valecha Engineering Ltd, Mumbai, Tantia Construction Ltd leh Raitani Construction company ten an thawk a. Phase II hi Buangpui atanga Lunglawn, Lunglei thleng, Kms 68 a thui chu Road Builder(Malayasia) leh Tantia Construction Ltd ten an thawk a ni.

He State Highway, Aizawl-Thenzawl-Lunglei kawngpui hi Serchhip-Hnahthial lam kawngpui aiin Km 71 in a tawi zawk a ni. Kawngpui hi double lane aia zim, single lane aia zau si -intermediate lane a siam a ni a. A zau zawng hi 5.50 metres a ni.He kawngpui siamna ah hian Damdiai - Sialsuk maintenance road leh Aizawl bypass, Thuampui - Selesih & Haulawng - Dawn maintenance road te a huam vek bawk a ni.

Hawnna inkhawm ah Chief Minister in thusawina a neih tan dawn tihah, power supply a tawp thut avang leh thlipui na tak a rawn tleh zui avangin inkhawm progrmme hi tih tawp a ngai a. Hawnna inkhawmah hian Pu Lalthanzara,Parliamentary Secretary chuan lawmna thusawi a nei a. Speaker, Council of Ministers leh MLA te bakah official leh mipui an thahnem hle a ni.