133/2024-2025

Aizawl the 11th April 2025: Tukin khan Chief Minister Pu Lalduhoma leh UD & PA Minister Pu K. Sapdanga te chuan Aizawl Ven Buk (Integrated Command & Control Centre under Smart City), Treasury Square a mi chu an tlawh.

Chief Minister chuan, Aizawl hmunhma lun zual lai cover vek thei CCTV network, record fiah leh changkang tak kan nei ve tawh hi a lawmawm a. A enkawlna lam hautak deuh mah se ram leh khawtlang venhimna kawngah a tangkai a ni. Duh thusamah chuan Aizawl chhung leh a chhehvel hnai vai, disaster thlen palh theihna hmun te huam thei ila a tangkai zual ang. He hmun tangkai lehzuala kan hman theih nan thawhhona tha in neih a tul dawn niin ka hria a, he hmun hmang tangkai thei department-te nen tha takin lo thawk tlang ula, kan tangkaipui lehzual thei ang, tiin thawktute a chah a ni.

Control Room chhunga inkhawm tawiah hian Pu K. Sapdanga chuan thuhma a sawi a. He control room zarah hian misual, rukru leh dawt sawi ching thlengin kan chhui chhuak thin. Tun hnaia mi pakhatin, "Raltlan, silai keng ten kut min thlak", a tih pawh kha thil dik tak chu he hmun atanga chhui chhuah a ni, a ti.

Pu CC Lalchhuangkima, CEO, Aizawl Smart City chuan an hnathawh dan tlangpui a sawi a. Aizawl khawpui hmun thlan bik 76 ah CCTV 237 leh Pan Tilt Zoom 39 dah a ni a. An dahna hmun zawng zawng mipui hnenah an hrilh vek lo. Hmun pawimawh lai chu an hmu thei deuh vek tawh a, hnai takah chiang takin mihring hmel hmai pawh an zoom thei. Hmun pangaah phei chuan hmel hre hranga chhinchhiah thei (Facial Recognition) Camera dah an ni. Lirthei pawh an vah velna thlengin an hre thei a, an Automatic Number Plate Recognition system hmang hian lirthei bo case 600 vel lai an ching fel tawh. Lirthei, traffic dan bawhchhia pawh an chhui zel thei a ni.

Hmun pangaah TV lian (Variable Message Display) dah tawh niin, man chawia hman theih a ni a, dah belh an tum leh mek a ni. Hmun 15 ah free wifi an pe chhuak mek bawk. An khawl hman hi a that avangin India rama a tha ber pathum zingah Aizawl ICCC hi a tel a ni. An thil record te hi a tlangpuiin ni 30 vel an dah tha a, hmanna tur awm lo va an ngaih chu an tibo ve leh mai a. Vawn that ngai chi erawh chu an vawng tha thin. Toyota Company chuan an CSR atangin Aizawl Traffic Management tihchangtlunna tura hmanrua, CCTV lam chi an rawn thawh belh nual a. Chung bungrua hmang chuan ICCC network hi tihlen tum mek a ni.

He hmun Aizawl Ven Buk (ICCC) hi April ni 1, 2023 khan Pu Amit Shah, Union Home Minister chuan a hawng a, Rs. 87.18 crore senga din a ni. A enkawl nan thlatin sum Rs. 7.8 lakh vel mamawh a ni. Mipui, a hmang tangkai duh tan Rs. 100 chawia hman theih a ni.

Chief Minister-in Aizawl Ven Buk a tlawhnaah hian Pu Lalmalsawma Pachuau, Secretary, Planning, UD & PA leh UD & PA thawktute, Aizawl Smart City Limited thawktute, ICCC enkawltu officials te leh Police Department official pawimawh te an tel a ni.