Chief Minister Pu Lal Thanhawla chuan vawiin khan District Institute of Education & Training (DIET) a hnathawkte intelkhawmna, All Mizoram DIET Employees Association General Conference vawi khatna, DIET Auditorium, Chaltlang-a neih chu a hmanpui.

Chief Minister chuan AMDEA in district paruka District Resource Centre (DRC), mini DIET tia hriat thin bawkte sorkar-in DIET puitlinga a hlankai lawmna ni pahfawma conference an hmannaa tel tura an sawm chu lawmthu a sawi a. DIETa thawk ten lawm nachang an hria chu Pathian duh zawng tak a ni tiin, malsawmna an dawn belh zel a beisei a ni a ti a. Sorkar hnathawkte chuan sorkar dinhmun hre tura ngaih an nih angin DIETa thawk ten thla li hlawh an la lo chungin sorkar dinhmun hriaa a nuar zawnga an kal duhlo chu an entawntlak hle a ni a ti a. Tunah hian sorkar sum dinhmun a tha lo hle a ni tiin, Pu Hawla chuan Reserve Bank-a sorkar sum neih chu asenin a kawk tawh a ni a ti a. Heti chungin GDP ah hmarchhak state te chu national average aia a san zawk thu leh hmarchhak bikah Mizoram chu a sang lawt lak a ni a ti. Food security bill  chungchangah  anih ang anga hmang tur chuan meretheite tahna ti tamtu a ni ang tiin, kan tlin ve loh tur thu central lam hotute pawh ka hrilh a ni a ti.

Chief Minister chuan DIET lecturer te chu lehkhathiam rual an nih sawilangin, zirtirtute zirtirtu in ni tiin, an pawimawhna hrechianga, an file khawih chu mihring an nih avangin mawhphurhna sang tak an keng tih hriaa role model an ni tih hre reng turin a chah a. Tih tur leh tihloh tur thliar thiam a, incheina thlenga fimkhur turin a chah a ni.

Khualzahawm Pu Lalsawta, Education Minister chuan sorkar-in kan ram leh hnam tana tha ber tura angaih chu huaisen takin a kalpui a ni a ti a. Tunhnaia Mizoram rawn tlawha lo zin, central sorkar-a additional secretary in teacher education-ah Mizoram chu model state-ah a awm thei a ni a tih hian Mizote hi kan neplo a ni tih a tilang a ni Pu Lalsawta chuan a ti a. Hmanraw hlui chu hmanraw tharin a thlak thin angin keini pawh hun thar kan tawn ang zelin kan inchher tur a ni a. Hmanraw hlui bawk kan hman chuan hmantlak loah kan chhuak thei tih hriain, zirtirtute zirtirtu chuan hmanraw thara zirtir chu a ngaipawimawh hle tur a ni a ti. 

Conference hi AMDEAchuan sorkarin 5th April 2013a DRC 6 DIET puitlinga a hlankai avangte, senior lecturer post hnawh khah avang te, clerical staff te regularise avangte leh principal post ruak hnawhkhah avang tein sorkar hnena lawmthu sawina hun atana hman a ni a. DIET hi Primary leh Middle School zirtirtute trainingna a ni a, district 8 a thawktu zawng zawngte hi 250 vel an awm mek a ni. AMDEA hi 31st May 2013 maia ding tan a ni a, vawiin conference ah hian Chief Minister’s Relief Fund-ah Rs.20,000/- an pe a ni.