Vawiin hian Disaster Management and Rehabilitation Department bul tumin Department hrang hrangten chhiatrupna lo thlen palha hma an lak dan tur chung chang zirhona (workshop) nikhat awh tur Synod Conference Centre ah buatsaih a ni a. Home Minister, Pu. R Lalzirliana, khuallian chuan he workshop hi a hawng a. Pu. Nihar Kanti Chakma, Minister of State, DM&R chu khual zahawm a ni.

Thu sawiin khuallian chuan Mizoram chu LALPA hriat ram chhiatna tam tak laka a ven tlat nimahse khawvela kan awm chhungin leilung chhiatnate hi kan pumpelh vek thei bik lova chutiang a lo thlen hun atana kan lo inpuahchah that chu tihmakmawh a ni, a ti a. Kan ram leilungte ngaihtuahin engtiklai pawha chhiatna chi hrang hrang leimin, tui lian thlipui leh lirnghingte bakah mihringte siam chawp chhiatrupna tawk thut thei reng kan nih avangin sawrkar pawhin hetiang lama inbuatsaihna kalpui hi ngai pawimawhin nasa takin hma a la mek a ni. Tun dinhmunah Armed Police Battalion pasarihah Disaster Response Force din an nih tawh thu tarlangin anni hian mi tam zawk hnenah training an pe mek reng a ni, a ti a. He workshop chhim tura kal Department hrang hranga officer te chu chhiatna kan pumpelh theihna turte, a lo thlen pawha kan tihnep theihna turte leh kawng hrang hranga inbuatsaihna ah a tul dan ang zel huai taka hma la turin a sawm a ni.

Khual zahawm Pu N.K Chakma pawhin thuhma sawiin kum reilote liam ta chhunga leimin, thlipui leh ruahpui vanga nunna, huan thlai, ran mai bakah hmasawnna ruhrel kan chan tak Disaster Management and Rehabilitation Department in a chhinchhiahte chu a tam tawh hle a ni, a ti a. Heng chhiatna lo thleng thei laka kan inralrin dan tur leh hmalak dan tur ruahmanna Disaster Management Act 2005 in a neihte chu kan zawm a ngai a; he danin a phut angina department tinten mawhphurhna pawimawh tak an nei vek an ni, a ti. Disaster Management and Rehabilitation Department chu nodal Department ni mah se Department dangte nena thawh hona tello chuan member neilo zaipawl conductor ang chauh an ni, a ti bawk. Department hotulu leh nodal officer kalkhawmte chu dan in a phut ang taka chhiatrupna laka hmalak dan tur fel fai tak (action plan) nei theuh turin a ngen a ni.

He workshop hi Pu P.C Lallawmsanga, IPS, Principal Secretary, DM&R in kaihruaiin Department hrang hrang atangin Head of Department leh Nodal Officer mi 67 ten an chhim a, chawhma lamah thupui pathum Disaster Management Act 2005, Departmental SOP leh Emergency Support Function te zir hovin chawhnu lamah thupui pahnih Office DM Plan leh Non- Structural Mitigation Measures te an zirho a ni.