Chief Minister Pu Lal Thanhawla chuan vawiin khan I&PR Auditoriumah All Mizoram Women Federation (AMWF) General Assembly a hmanpui.

Chief Minister chuan a hnam bil zawng niloa, a huap zau zawka Mizorama cheng hmeichhia zawng zawngte dinhmun chawikanna tura hmala duhtu AMWF a awm hi a lawmawm hle a ni a ti a. India khua leh tui vek kan ni a, he kan nihnaah hian kan chiang tur a ni a ti a. India hi hnam bil zawngin kal ta se Mizote hi tun ang dinhmunah kan din a rinawm loh tiin, Chief Minister chuan India Danpuiin min humhalh avangin central serviceah leh a dangahte kan inhlangkai thei thin a, keini pawhin kan zinga a tlem zawkte hi kan kaihkuah thiam tur a ni a ti. Mizoramah hnam chitin kan awm a, chanvo leh tih tur inang (equal rights) theuh kan neih hi kan hre reng tur a ni a ti.

Mizoram hmeichhia te rorelna sanga an awm loh chhan leh politicsah vawrh chhuah an nih lohna thin sawiin, Pu Lal Thanhawla chuan kei nin candidate turin duh mahila, bial mipui tur ten an duh ang em, an tling zo ang em tih ngaihtuah hmasak a ngai thin a ni a ti a. Rorelna sangah awm se kan duh laiin hmeichhia ten an zir ve angai ani a ti. Ram hmasawnna a sawiah Chief Minister chuan kuttlinglova sum lakluh kan tumna avangin kan rama project pawimawh din turah diklo taka compensation kan beisei thin avangin a thuanawp phah nasa tiin, oil leh gas zawnna turah te pawh kutthlakna tur ram te mimal ram alo ni zel si a, hna thawktu tur company te kalphungah compensation pek a theih thin silova, chuvangin hma kan sawn tur angin kan sawn theilo a ni a ti.

Khauzahawm Nl. Vanlalawmpuii Chawngthu, MLA & Chairperson, Mizoram State for Women Commission pawhin thusawiin, Mizoram hmeichhia zawng zawngte tel theihna AMWF a awm hi a vanneihthlak hle a ni a ti a. Mipa te hi hmeichhe lu an ni tih kan hriat reng a tha tiin, keini chu kan pasalte leh fanaute enkawl tur kan ni a ti a. Pawngsualna thlen thin chhan pakhat nia lang chu hmeichhiate inchei dan hi ani tiin, kan fanute incheina leh an inchei duhdante kan enpui a kan hriatpui a tul a ni a ti a, kan khawsak mila inchei kan zir te pawh a tul a ni a ti. Kan pasalte hi eiruknaa hnukluttu kan ni em tihte kan inenfiah a tha Nula Awmpuii chuan a ti a, eiruknaa inhnamhnawihlo tura fuihtu nih zawk i tum ang u a ti a. Rorelna hmuna thu ve thei tura sorkarin seat min hausak se kan tih thinah pawh, kan dinhmun leh nihnain a tlin em tih kan ngaihtuah hmasak thin a angai a ni a ti.

AMWF hi kum 2011 November ni 11 khan hnam bil ang zawng nilo, Mizorama hmeichhia chengte inpumkhatna a awm theihna tura din a ni a. Tunah hian pawl hrang hrang 11 an inthlungkhawm mek a. Chung pawlte chu Mara Chano Py, Lai Women Association, Chakma Mahila Samity, Panchayat Mahila Shakti Abhiyan, Mizoram Gurkha Women Association, Mizoram Mahila Sangathan, Mizo Hmeichhe Tangrual, Society for Economic Upliftment, Bru Women Federation Mizoram, Life Promoting Society leh Women with Purpose Mizoramte an ni.

Assembly a palai kalte leh khuallian leh khualzahawm, member kal zawng zawngte hi AMWF President Prof. Lalneihzovi’n lawmna thu a sawi hmasa a ni.

Attachment

  • Loading attachment...