Vawiin hi India Hnam Pa Mahatma Gandhi pianchamphaphak a ni a, amah zahna entirin tukin zing dar 7:30 khan Zodin kuala a limah Sorkar mipawimawh tak tak ten pangpar an dah. Pangpar dahtute zingah hian Chief Minister Pu Lal Thanhawla, Minister te, Parliamentary Secretary te, Dy. Speaker, Chief Secretary, Principal Secretary te leh Secretary te an tel a ni.

Mahatma Gandhi lima zahna pangpar dah a nih hnu hian Hnam Pa in ‘India hi fai se’ tia alo suangtuah thin tihpuitlinna tura Prime Minister Narendra Modi an India ram puma faina thlak beihpui, ‘Swachh Bharat Abhiyan’ ‘Clean India Mission’ tih chu Chief Minister Pu Lal Thanhawla chuan a hawng nghal a. Thu a sawiah Pu Hawla chuan Mahatma Gandhi khan faina a ngaihpawimawh thin avanga hma tam tak alo lak tawh thin thu a sawi a. A pianchampha a Prime Minister Narendra Modi an clean India tih beihpui thlak a hawng hi a inhmeh hle a ni a ti a. Mizoramah chuan hun engemawchen kalta atanga faina hapta tia kan kalpui thin thu a sawi a. Mizote hi bal thang, civic senseah phei chuan pachhe tak ka ni a ti a. Faina hi Pathian kan an teuhna ber a ni tiin, fai hi mitin mawhphurhna a ni a ti a. Prime Minister ngenna leh faina hapta kan hman hian chhung leh pawn thianghlimna kan zavaia nei turin theihtawp i chhuah tlang ang u tiin, Chief Minister Pu Lal Thanhawla mipuite a sawm a ni.

Swachh Bharat Abhiyan beihpui thlakna tur hawn anih hnu hian Faina Thutiam sawiho a ni a. Sorkar mipawimawhte leh mipui kalkhawm zawng zawngte chuan helai hmun hi phiah fai hna a huhoin an thawk nghal bawk a ni.