3435/2023-2024

Dated Aizawl, the 22nd January, 2024: Vawiin khan Chief Minister Pu Lalduhoma chuan Luangmual Industrial Growth Centre-a Anna Food Production Industry a hawng.

Thusawiin Chief Minister chuan, kan rama resources awmsa hmang tangkai thiam te, kan kuthnathawktute thil tharchhuah lo process thiam te leh mipuite awlsamna thlen thei hmalakna nei thiamte (entreprenuer) kan mamawh em em a. Chutiang tithei zinga pakhat Anna Food Production Industry thar kan hawng hi ka lawm hle a ni. Bawnghnute thartute tana Industry tangkai leh an hlawkpui tak ni ngei turin ka beisei che u a. Industry hlawhtling in nih theihnan duhsakna ka hlan che u a ni, a ti. Mizo thalai, entreprenuer thate tan sawrkarin kawngka zau taka a hawnsak tur thu leh Hand Holding Policy hmanga an tana ruahmanna tha tak an siam tur thu te a tarlang bawk a ni.

Khualzahawm Pu PC Vanlalruata, Agriculture Minister pawhin thusawiin, IGC chu hma a lo lak ve tawhna hmun anih avangin a inti neitu hle tih a sawi a. Anna Food Production ten hmalakna tha tak an rawn kalpui avangin a lo awm tawhsa te kan lawm em em a ni. He hmunah hian Industry neitute an la tam loh avang leh a ti chhunte an hlawhtlin thin avangin, rawn lut hi tam zel se kan duh a ni, a ti bawk. Mizoram sawrkarin loneitute tharchhuah te state pawna hralh tlak ngeia process-a tum dan te pawh a sawi a ni.

Anna Food Production dintu leh neitu Pu Daniel Lalawmpuia pawhin thusawiin, kum 2020 kuma Belpui pakhat leia a nupui nen bul an tan thu leh kar khat chhung leka Belpui pariat an mamawh chhoh dan a tarlang a. Sum leh pai engmah nei lova bultan an nih avanga harsatna an tawh dan ngaihnawm tak leh sawrkar hotuten mak tak maia an duhsak zui dan te, chu an duhsakna leh tanpuinain amaha tumruhna a siam nasat thin thu te a sawi a. SBI Dawrpui Branch ten kei, engmah nei lo min rin vanga he Industry hi puitling thei ta a ni, a ti bawk. Amah lo tanpui thintu zawng zawng te chungah leh Chief Minister chungah lawmthu a sawi a, hlawhtlinpui ngei an tum thu sawiin, lo thlir zui turin Chief Minister hi a chah a ni.

Pu K. Zobiakvela, Food Technologiest, B.Tech (Food Technology) Anna Food Production pawhin technical report a pe a, an hmanruateah cheng nuai za pali an sen tawh thu leh an bawnghnute supply tu tura Muthi lama bawng vulhtute nena Society an din tawh thu a tarlang a. Tunah Lassi deuh mai la siam rih mah se bawnghnute siam chu an tum ber tur a nih thu a sawi a, tunah hian thawktu mi 14 an awm mek a ni.

Commerce & Industries leh AH & Vety official pawimawh te leh sawm bik mi thahnem takin he hun hi an telpui a ni.