Vawiin tlai dar 4:00 khan Chief Minister Pu Lal Thanhawla chuan Mizoram Cooperative Apex Bank Ltd.-in RuPay Debit Card, ATM, a screen Mizo tawnga chhiar theih leh Website bakah Internet & Mobile Banking a siam te chu Mizoram mipui ten tangkai taka an hman theih turin Hotel Regency ah a hawng.
Chief Minister chuan Mizoram Cooperative hmasawnna leh Public Sector leh Private Bank changkang tak tak te ke pen ruala pen thei turin RuPay Debit Card, ATM (screen Mizo tawnga chhiar theih), Bank Website, Internet & Mobile Banking te hial hmang thei dinhmuna a lo ding ta chu lawmawm a tih thu leh mahni thawhchhuah, Sawrkar tanpuina leh buaipui ngai hauh lova mahni office building tur hial pawh lei theia a awm chu entawntlak leh lawmawm a tih thu a tarlang a. Apex Bank chu Mizo mipuite Bank a nih ang takin Sawrkar pawhin a duhsak zel tur thu a sawi. Mizo mipuite din a nih ang ngeiin Zoram mipuite pawhin uar zawka Apex Bank chu chhawr tangkai turin a ngen bawk.
MCAB RuPay Card, ATM, Website, Internet & Mobile Banking hawnna programme hi Home Minister Pu R.Lalzirliana, Finance Minister Pu Lalsawta, Cooperation Minister Pu Lalrinmawia Ralte bakah sawrkar mi pawimawh dangte leh State Level Cooperative Chairman & Managing Directors leh Prominent Depositors ten an hmanpui bawk a ni. Apex Bank hian Branch 12 neiin staff 166 an awm mek a, Mizoram-a Bank te zingah Credit-Deposit Ratio 67.80 % (31.3.2014) niin mipuite hnena loan pe chhuak tam ber leh Biak In 2,000 chuang sakna turin loan a pe chhuak tawh a, agriculture loan pawh interest rate hniamte-a tam tham tak pechhuaktu a ni bawk.
Meeting hi Pi T. Lalmuanpuii, Chairman-in a kaihruai a, Mizoram Sawrkarin a duhsakna zawng zawng avanga lawmthu sawiin AGM Pu A.Lallungmuana’n RuPay Card nihphung leh tangkaina te a sawifiah bawk.
