Nimin (28.11.2014) khan MZP Hqrs. Mamit buatsaih Inter School Cultural Dance Competition 2014 neih a ni a, Pu John Rotluangliana Minister , FCS&CA, Tranport etc Bialtu MLA ni bawk chuan khuallian niin a hmanpui a, Competition a ti tha te lawmman a hlan.

Hnam lam intihsiakna Govt Middle School II tualzawla buatsaih Pu Lalropuia President MZP Hqrs khaihruaiah Khuallian Pu John Rotluangliana chuan thusawiin mahni hnam zia zahpui reng reng hnam dingchhuak an awm ngai lova, ram ropui leh changkang a piangin an hnam zia an zahpui ngai lo a ni tiin Mamit khawpui chhunga school naupangte tana Mizo hnam lama intihsiakna buatsaih a ni chu lawmawm a tih thu a sawi a, hetianga hun tha tak leh hlu tak buatsaihtu MZP Hqrs, Mamit te chungah lawmthu a sawi a ni. Zirlai te an zirlaia tha taka zir chunga Mizo hnam nun leh zia te chawi nung reng tura chahin Mizo nih leh Kristian nih khawi hmunah mah zah pui lo va chawi nung zel turin a chah bawk.

Khualzahawm Pu K. Lalthawmmawia District Bawrhsap pawhin thusawiin School naupangte hnena Mizo hnam zia leh nunphung an hriat thar leh zualna tura hun buatsaih a ni chu lawmawm a tih thu a sawi a, Mizo Culture in a ken tel tlat aia Upa te zahna, Tlawmngaihna leh midang tanpui chakna te chu naupang ten kan chhawm nun zel a tul zia sawiin Kan mizo zia nghet taka chhawm nung zela tunlai hmasawnna in a ken tel Internet, Facebook te hi a chin tawk thliar thiam turin School naupangte a chah a ni.

He Inter School Cultural Dance Competition 2014 ah hian Mamit khawpui chhung tangin School 12 telin heng zingah hian Presbyterian English School chu pakhatna an ni a, Trophy leh Rs 5,000/- an dawng a ni. 2-na Govt High School niin Trophy leh Rs 3,000/- an dawng a, 3-na Govt Higher Secondary School niin Trophy leh Rs 1,000/- an dawng bawk a ni. Lawmman te hi Khuallian Pu John Rotluangliana, khualzahawm Pu K. Lalthawmmawia leh Uaptu Pu P.C Lalthanzuala Chairman Joint V/C ten an sem a ni. Lawmman te hi Nehru Yuva Kendra (NYK) Mamit ten an tumsak a ni.