: UN Joint Initiative Project atana Mizoram sorkar leh UNO thawh hona bawhzuiin India rama UN Agency 4 – UNDP, UNIDO, FAO leh ILO te chuan November 25, Thawhlehni atang khan December ni 6 thleng cham turin Mizoram an chamchilh mek a. Group hrang hrang ah inthen darhin Aizawl leh district thenkhata thingtlang khuate an fang a. Kuthnathawktute leh khawtlang hruaitute kawmin chipchiar takin an eizawnna leh an khawtlang dinhmun te an sawipui a ni.

Nimin piah khan UN Agency 4 aiawh te hian a rualin Thiaka mimal serthlum huan tlawhin Thiak-a Horticulture department enkawl, Centre of Excellence ah nilengin kuthnathawktute leh khawtlang hruaitute an kawm a. He Centre an chhawr tangkai dan te zawtin horticulture eizawnna atanga mimal leh a khua in hlawkna an tel dan te, harsatna an tawh te, eizawnna a hmeichhiate dinhmun leh an dehchhuah hralhna chungchang te an sawipui a. Nimin khan Nisapui tlawhin Nisapuia Bamboo Cultivators Society te mau chinna hmun an en bakah kuthnathawktute leh khawtlang hruaitute nen nilengin Nisapui Community hall-ah an inkawm bawk a.

Thingtlang khua an fanna ah te hian NLUP Implementing Board leh sorkar department official ten tawiawmin heng an inkawmna a an thil hmuh leh hriat atang te hian UN Agency hrang hrang te hian UN Joint Initiative Project atana scheme kalpui turte a enkawltu sorkar department ten en an duang nghal dawn a ni. Nimin vek khan UN Team zing atangin FAO aiawh Dr. A.B.Negi chuan Serchhip district a tlawh bawk a. Serchhip D.C hovin official ten nen meeting an neih bakah Serchhipa vawkvulhtu ten PRRS natna an tawrh dan te a enfiah nghal a. Myanmar atanga vawk lakluh dinhmun en turin kar leh khian Champhai a tlawh bawk ang. UN team te hian vawiin ah Sihphir tlawhin kuthnathawktute an kawm a. Tuna la cham mek te hi UNIDO aiawhin Sandeep Tandon leh Manjula Bhuyan, FAO aiawhin Dr.Antonio Paliwal leh Dr.A.B.Negi, UNDP aiawhin Anushree Bhattacharjee an ni a. Naktuk hian ILO team te an lo thleng ve leh dawn a ni.