Aizawl Theological College (ATC), Durtlang chu Serampore College University Synod in a dinhmun rawn hlangkaiin, Doctor of Theology (D.Th) zir theih turin Doctoral Center ah a puang a. Chumi hawnna chu ATC Chapel-ah neiin Rev.Lalramliana Pachuau, Moderator MPC Synod in tawngtaiin a hawng a, Chief Minister Pu Lal Thanhawla chu khuallian a ni.

Chief Minister chuan Pathian thua doctorate zirna Mizoramin kan nei thei ta chu a lawmawm tak zet a ni, a ti a. Hemi nei tur hian kohhrana sulsutute leh kaihruaitu te thawhrimna rah tih a chiang a. Ringtu nih chuan theology hi hriat ve a pawimawh a ni tiin, khawtlang nun kaihhruai nan te a tul hle a ni, a ti. Chief Minister chuan kan zavai hian chanchintha hril tura koh vek kan ni a, chuvangin kan awmna apiang hi A rawngbawl tura min dahna a ni a, tui tak leh rinawm takin kan thawk mai tur a ni, a ti.

Chief Minister chuan Mizoram hian khualzinmite hmuh chak tur hmun kan neih tam loh avangin ATC pawh hi khualzinmite tlawh duh tur zingah sorkar chuan a thlang a, a kalpawhna kawngpui siam that nan sorkarin sum pawh a tifel tawh a ni, a ti.

He huna khualzahawm, Rev. Dr. H.Vanlalauva, Dean & Director of Research, South Asia Theology Research Institute, Serampore in Serampore Collge University rawn chawr chhoh dan chipchiar taka sawiin, a hnuaia Affilliated College te leh doctoral center din a nih theih dan te a sawi a. ATC Doctoral Center hi Serampore College University Synod in hun rei tak chhung Committee for Researchin uluk taka a zirchian hnu a doctoral centera hlankai anih thu sawiin, a rual hian Kerela a Faith Theological College, Manikala a mi pawh hlankai a nih thu a sawi a. India ram hrang hrangah doctoral research center pariat a awmna a ni a, ATC chu India hmarchhaka a hmasa ber leh a awmchhun a ni, a ti. ATC doctoral Center ah hian subject thum - New Testament, Christian Theology leh Missiology a zir theih dawn a, Missiology subject phei chu doctorate zirna subject awm chhun a ni.