Mizorama AYUSH Hospital hmasa ber tur, a lungphum nimin khan Thenzawl-ah Chief Minister Pu Lal Thanhawla chuan a phum.

Chief Minister chuan Ayush Hospital tur lungphum a ni ta chu Mizoram tan ni pawimawh leh chhinchhiah tlak a ni a ti a.Mihring hriselna inenkawlna kawngah, Indian civilisation upa tak hian khawvel dangin an hriat hmain alo hre daih tawh a ni tiin, hriselna leh hmasawn nan a pawimawh hle a ni a ti.Homeopathy hi scientific tak, a damdawite phei chu ngaihsan awm tak, mihringte tan tangkai tak a ni a ti a. Hetiang Hospital tha kan neih tur hi a mamawh lo tu nih theuh tum a, mahni hriselna ngaihpawimawh nachang hre theuh zawk turin a chah a ni.

Chief Minister chuan he hospital tur atana ram acre 30 lai a zau petu hnenah lawmthu a sawi a. Hmasawnna project lian tham nei turin a thlawn a ram pek hi central sorkarin a phut thin avangin, compensation beisei lova ram ruak humhalh tlattu ni turin Zoram mipuite chu a chah bawk a ni.

Health Minister Pu Lalrinliana Sailo pawhin thusawiin, Ayush Doctor-te leh Medical (allopathy) doctorte hi inkalpawh tawn reng tur an ni a ti a.India ramah Ayush hospital 3371 leh Ayush Doctor 7,55,000 an awm mek thu a sawilang bawk a. Central sorkarin Mizoramah Nursing School 6 a rawn phalsakah 4 hi kan tawk turah dahin, Champhai, Saiha, Serchhip leh Kolasib-ah te bul tan mek anih thu a sawi a; hemi atan hian central sorkar chuan sum Cheng vaibelchhe 19 a rawn pek tawh thu a sawi bawk.

AYUSH hi Indian System of Medicine a ni a. A hi Ayurvedic, Y hi Yoga & Neuropathy, U hi Unani, S hi Siddha leh H hi Homeopathy tihna a ni a. Mizoramah chuan Ayurvedic leh Homeopathy te chauh hi la kalpui rih a ni. Tuna hospital sak tur hi central sorkarin state 3 te zinga a pek ve a ni a. Avaiin Rs.900 lakhs a pekah Rs.750 lakhs chu khum 50 awmna tur hospital sak nan a ni a, Rs.130 lakhs chu hnathawktu tur 76 te hlawh tur a ni a, abak Rs.20 lakhs chu damdawi atan a ni.Mizoram district tinah Ayush OPD Clinic dah vek tawh a ni a, Ayush Doctor 21 awm mek bawkin post 1 chiah hi regular post a ni.Sum rawn sanction hi Central sorkarin 85% tumin, abak 15% chu Mizoram sorkar tum tur a tih a ni. Hospital hi hman theih anih veleh Ayush College a siam tura ruahman a ni bawk.

Lungphum inkhawm hi Pi M.Zohmingthangi, Secretary to GOM, Health in a kaihruai a. Chief Minister te nupa leh Health Minister te bakah I&PR Minister Pu Zodintluanga, Parliamentary Secretary Pu S.Laldingliana leh MLA Pu Hmingdailova Colney te an tel bawk a ni.