3532/2024-2025

Dated Thenzawl, the 14th December 2024: Pu B. Lalchhanzova, Minister nu leh pa Pu B. Lalthuamliana leh Pi Rohnuni te hriatrengna Football Tournament, Thenzawl Zone Football Association ten Lothazawl playground-a an buatsaih kharna hun chu vawiin khan bialtu MLA Pu Lalduhoma, Chief Minister chuan a hmanpui. Pi Lalrinpuii Tourism Minister leh Pu B. Lalchhanzova, Supply Minister ten Chief Minister hi an tawiawm.

Thu a sawinaah Chief Minister chuan, "Pu B. Lalchhanzova'n Football hmasawnna leh thalaite hriselna ngaihlu a, nu leh pate chawimawi duhna thinlung pu chunga hetiang a buatsaih thei hi a fakawm ka ti a. Mahni pianna khua hmangaih mi a ni tih pawh a hriat a, a entawntlak a ni," a ti.

A thusawi dang te chu:

1. Football hi khawvel ngaihhlut infiamna a nih avangin a thiam te tan eizawnna remchang a tam a. Foreign leh India ram chhungah pawh hausakpuina tham hmun tha a tam hle. Tunah pawh hian Mizo tlangval, ISL a khel kan nei fur a, Serchhip tlangval te pawh an awm. Mizo tlangval hlawh tha zualte hian kar khatah cheng nuaih hnih vel lai an hlawh thei a. An kar khat hlawh hi Mizoram senior grade officer te thla khat hlawh aiin a la tam zawk a ni. ISL khel pha chiah lo tan pawhin I - league kan la nei leh zel a. Tih tak takna nena bei tan chuan dinchuahna kawng hi a awm a ni. Mahnia zuk ngaihven vak pawh hi a ngai lo, club lam zawk hian an rawn ngaihven tawh zawk a ni.

2. Vawiina footballer langsar ber ber te hi retheihna leh harsatna tam tak paltlang tute an ni a, kawngpui dunga inkhelh bul tan a, atchilh zui ta an ni deuh ber. Tin, pianpui talent nei an awm a, a hranpaa inzir chhuak an awm bawk. Talent pawh hi tihpun ngai, zir zui ngai tho a ni. Tuna kan MLA ni mek Pu Jeje Lalpekhlua pawh hian, “A hranpa takin talent ka neih ka hre lo, taima tak leh chhel taka ka zir rah a ni” a ti mai. He infiamna huanga hlawhtling tur hian chance in nei vek tihna a ni. 

3. India ram hi 2036 ah Olympic thlen tumin a inbuatsaih mek a, chu Olympic ah chuan Mizo thalaite India aiawha an tel ve ngei theih nan Vision 2036 kan lo kalpui ve thung a. June ni 13 khan Baptist Centre-a Sport Conclave kan neihnaah ka puang a ni. Kan Sports Minister Pu Tetea hovin, Olympics Discipline, kan lo inpuahchah ve theihna kawngah kan inpuahchah nasa dawn. Kan tum ber chu kan naupang, talent nei te zawn chhuah a, training pek a, India aiawh thei tura chher a ni, tih te an ni a.

4. Thenzawlah MLA fund leh fund dangte hmangin Indoor Volleyball Stadium din kan tum mek a, Community Hall pawh kan theih angin kan ngaihtuah zui ang. Football house in dil te pawh hi a kawng kan zawng dawn nia.

Chief Minister hian Christmas leh kumthar lo thleng mai tur chibai a buk bawk.

He tournament bultumtu Pu B. Lalchhanzova pawhin thusawiin, Pathian leh mipuite zara MLA hial ka lo nih tak vang te, kan Chief Minister-in kan in leh lo min rawn hmuhpui ve theih nan te, ka nu leh pa te hriatreng nan te he hun buatsaih hi thain kan hria a. Vawiinah a taka tihhlawhtlin a lo ni ta hi kan lawm a. Thenzawl Zone Football Association chungah pawh kan lawm hle a ni, a ti a. Chief Minister kaihhruaina hnuaia hmasawnna hna chak taka thawh a nih dan tlangpui a tarlang bawk.

A kharna inkhawm hi Pu Liantluanga Renthlei, President, TZFA in a kaihruai a, Pu Jimmy LH Zuala, Finance Secy, TZFA in technical report a pe. December ni 3 atang khan tournament hi an tan a, team 13 an tel a, an zinga team pathum hi Thenzawl pawn lam atanga tel an ni.

A kharna inkhawm hi Pu Thanglianchhunga, Sr. Vice President, TZFA chuan lawmthu sawiin a khar a ni.