3533/2024-2025
2024 Pawltlak thla ni 14: Vawiin khan Mizoram sawrkara Excise & Narcotics Minister Pu Lalnghinglova Hmar hovin Lungleia sawrkar official-te, tlawmngai pawl hrang hrang, kohhran hrang hrang leh District MJA hruaitute chu Lunglei District-a ruihhlo do kalpui mek dan thlir ho leh hma lak zui zel dan tur ngaihtuahin Lunglei DC Conference Hall-ah an ṭhu khawm.
Excise & Narcotics Minister Pu Lalnghinglova Hmar chuan Mizorama ruihhlo hluar zel chu engtin nge ṭang rualin kan do ang tih ngaihtuah turin ṭhut khawm chu buatsaih a nih thu sawiin, kohhran, NGO leh sawrkar ṭan hona chuan awmzia a nei ngei ang, a ti a. Sawrkar, NGO, kohhran leh khawtlangin mahni hma zawnah kan thiam dan danin ruihhlo chu kan do ṭheuh va, sawt zawka kan do theih nan kan hma lakna inhriat tawnpui a ṭul tiin, sawrkar chuan NGO leh kohhrante nen awmze nei zawka thawh ho zel dan tur a ngai pawimawh tih a sawi a. Ruihhlo chu kan beih loh chuan kan tlawm tawh tihna a ni a, kan do loh chuan min hneh dawn a ni tiin, ram chhanna thil a nih avangin tih tak taka beih a ngai a ni, a ti a. Ruihhlo dona kawngah theih tawp chhuah zel turin kal khawmte chu a chah a ni.
Sawrkarin ruihhlo do a ngaih pawimawh avangin Excise & Narcotics Department (END) pawh a thuam chak mek tih sawiin, Minister chuan Saitual, Khawzawl leh Hnahthialah te Excise Station thar hawn a nih thu te, lirthei 18 (ke li nei 14 leh ke hnih nei 4) lei belh tura ruahman a nih thu leh thawktu sub-inspector 7 lak tawh bakah, inspector, SI, ASI leh constable te lak belh tura ruahmanna a awm thu a sawi a. Ruihhlo dona kawngah chhungkua ṭan rual a pawimawh tih sawiin, a bikin chhungkaw pate chhungkaw veina lamah ṭhan harh a, ṭan a ngai, a ti a. Ruihhlo donaah damdawi mai piah lamah zu leh zuk leh hmuam thlenga ngaihmawh leh hma tel a ṭul tih sawiin, ruihhlo tirem tura ṭan lak te, a ti mekte'n an simna tura hma lak leh a la ti ve lote ven him an nih theih nana theih tawp chhuah te chu tha thlah lova kalpui reng a ṭul a ni, a ti.
He ṭhut khawm ni Lunglei District Bawrhsap Pi Navneet Mann chuan kaihruaiin, inlawmna thu a sawi bakah, Lunglei District Administration aṭanga ruihhlo dona kawnga hma lakna ṭhenkhat a tar lang a. June ni 26, 2024-ah International Day Against Drug Abuse and Illicit Trafficking puala hun hman a nih thu te, ṭhalaite leh zirlaite zingah ruihhlo ti lo tura intiamna leh inzirtirna kalpui a nih thu te, ruihhlo ngaite enkawlna hmun hrang hrangah thu ṭha inhrilh leh hriselna endikna kalpui a nih thu te, November ni 14 khan peer educator 25 training pek an nih thu te, khaw tinah ruihhlo dona kawnga hma la tur village level task force din chhoh mek a nih thu leh January 2025-ah chuan din kim hman beisei a nih thu te a sawi.
END Commissioner Pu Z. Lalhmangaiha leh Lunglei District Superintendent of Police Pu J. Lalmuankima te bakah, Lunglei Municipal Council (LMC) Councillor te, District Education Officer te, Lunglei Sub-Headquarters YMA hruaitute, kohhran hrang hrang ai awhte leh MJA lam aṭang tein an hma lakna report leh an ngaih pawimawh zawngte ngaihthlak a ni a. Lunglei District-a ruihhlo dona kawngah Police, Excise, YMA leh VDP te'n thawh hona ṭha tak an neih thu te, ruihhlo pawh a kiam viaua a lan laiin tun hnaiah a lo hluar thar leh deuhva a lan thu te, hunpui vuakvetah ngawrh zawka hma la tura ruahmanna siam a nih thu te ngaihthlak a ni a. DC Office, Police, School Education, YMA leh kohhran hrang hrangte'n mahni pual leh thawk ho te'n zirna in, kohhran ṭhalai leh vantlang zingah te ruihhlo ṭhat lohzia inzirtirna an kalpui dan te ngaihthlak a ni bawk a. Lunglei District-a ruihhlo ngai leh a zuarte dinhmun bakah, ruihhlo a hluar zel loh nana hma lakna kal mek leh hmachhawp awm te sawi ho niin, ṭan lak ngaihna lai leh thawh ho zel dan tur te sawi ho a ni bawk.
He hunah hian Excise & Narcotics Minister Pu Lalnghinglova Hmar chuan YMA Lunglei Sub-Headquarters Anti-Drug Squad (SADS) te hnenah ruihhlo dona kawnga an hma lakna atan pawisa fai ₹ 10,000/- (cheng sing khat) a hlan nghal bawk.
Attachment
- Loading attachment...
