3534/2024-2025

2024 Pawltlak thla ni 14: Vawiin khan National Handloom Development Programme (NHDP) hnuaia Small Cluster Development Programme (SCDP) kal tlanga Mualṭhuam 'N' leh Kanghmun 'S' khuaa puan tah in (individual workshed) sakna tur dawngtute hnena sem chhuahna hun Mualṭhuam 'N' Community Hall-ah buatsaih a ni a. Lunglei High Powered Committee Vice Chairman, Lunglei North bialtu MLA Pu V. Malsawmtluanga chuan Khuallian niin a hmanpui.

Khuallian Pu V. Malsawmtluanga chuan sawrkar laipui aṭanga khua leh tuite hamṭhatna tur ruahmanna hrang hrang kalpui ṭhinah a dawngtute'n an hman dik tawk loh avangin dawn leh turah harsatna tawk an awm ṭhin tih sawiin, NHDP SCDP hnuaia puan tah in sakna dawngtute chu rin tlak leh belh chian tlaka an sum hmuhte hmang ngei turin a chah a. Kanghmun South leh Mualṭhuam 'N' khuate chu puan tah (handloom) kal tlanga khaw dangte tana entawn tlak, model khua ni ngei tura ṭhahnem ngai taka hma la chhunzawm zel turin a chah a ni.

He hun hi Mizoram sawrkara Commerce & Industries Department Director Pi Maria CT Zuali chuan khual zahawm niin a hmanpui bawk a. Mizo zingah puan tah chu hmeichhe tih tura dahna rilru a awm tih sawiin, chakna leh theihna ngah zawk Mizo mipate'n handloom chu luh chilh tak tak se a duh thu a sawi a. Faina ngaih pawimawh leh taimak chu hmasawnna atan a pawimawh thu sawiin, mahni kut chhuak leh kut kawih ngeia Mizoram kan intodelh theih nan kawng hrang hrangah ṭhahnem ngai taka hma lak a ṭul thu a sawi bawk.

He hun hi Mualṭhuam 'N' Village Council Vice President Pu V. Lalramzauva'n a kaihruai a. C&I Deputy Director (HTH) Pi Hunthianghlimi  chuan technical report a pe bawk.

NHDP hnuaia Small Cluster Development Programme kal tlanga puan tah in sakna (construction of individual workshed) sem hi Mualṭhuam 'N' aṭangin mi 173 leh Kanghmun South aṭangin mi 121-in an dawng a. Puan tah in sakna tur hian ₹ 1,20,000/- (cheng nuai khat sing hnih) ṭheuh pek an ni.