Assam a chi leh chi inkara buaina chhuak in a nghawng, Bangalore lama Hmarchhak mite tana boruak muanawmlo awm niawm a chanchinbu leh TV lama thudawn anih avangin, Bangalore a hmarchhak mite, abikin Mizo zirlaite leh hnathawka awmte thlamuang taka an awm theih nan leh an sahimna ngaihtuahsak turin Chief Minister Pu Lal Thanhawla chuan Prime Minister leh Home Minister te chu telephone in a ngen a. Prime Minister chuan a rawn chhannaah Bangalore ah boruak thalo thleng thei tur lakah a tul anga hmalak a ni ang tih Chief Minister chu rawn hrilhin, tunah hian Bangalore chu hmarchhak mite tan a himin hlauhthawn tur a awmlo a ni a ti.
Chief Minister hian Karnataka Chief Minister Jagdish Shettar pawh lehkha thawnin, Assam buaina avanga Bangalore a mi tu tih hriat loh tena lungawi loh lantir nana hmarchhak mite rikrap leh tithlabar zawnga boruak an siamah, khua a tlai hma a thil duhawmlo leh thalo a thlen loh nan tul ang zawng zawnga hmala turin a ngen bawk a ni.
Hriat tawh angin Bangalore a hmarchhak mite tana boruak thalo awm anga thu a darh avangin Nagaland Chief Minister pawhin Home Minister hnenah a tula anga hma la turin alo ngen tawh bawk a ni.
