Pu Lal Thanzara, Parliamentary Secretary I& PR chuan, Mizorama Media mi, thuziak mite hian in thuziakin mipui leh ram tan thil tha a siam dawn em tih ngaihtuah chungin in zalenna hmang thin ang che u, a ti.

Vawiina Kolasib MJA ten an District chhunga Kohhran leh YMA hminga chanchinbu chhuahtute leh journalist te puala Journalist workshop, Kolasib AMFU Hall-a a buatsaih hmanpuiin Pu Lal Thanzara chuan he thu hi a sawi a. Thu ziah kawngah hian ziakmite kan fimkhur a ngai a, thu hriat apiang ziah hi ram leh khawtlang tan a himlo fova, Freedom of the Press tih pawh hi tawpchin (limit) nei a ni tih kan hriat a tul a ni, a ti. Zalenna hi midangte tana pawi thlenthei a nih chuan a him lova, mahni lam insiam fel hmasa lova midangte diklohna lai ringawt hailan tum pawh hi a Pathian thu lo a ni, Pu Lal Thanzara chuan a ti.

Media te chu hnam/chi leh chi inkara boruak tha siam kawngah hma la theitu an ni tih sawiin Kolasib phei chu ramri depa awm leh hnamdangte nena inhne renga awm an nih avangin thuziak mite in fimkhur a tul a. A hnam anga mi rilru tina zawnga thuziah leh tawngkam dengkhawng hman loh a tha a ni, a ti bawk. Ziak mite chu zoram pawn thleng phak National paper-ahte thu tha ziah ching turin a fuih bawk a ni.

Pu Lal Thanzara chuan, Mizoram journalist te chu sawrkar hmalakna an puangzar tha- a a hriat avangin a fak a. Power,education, medical lam a ni emaw, tuna Pu Hawla sawrkar chuan hma a la nasa takzet a ni tih pawh chik taka thlirtu tan chuan phatrual a ni lova. Tunah hian District tinah Development Board din thar a ni a. Corruption dona kawngah nasa takin a thawk a. Power lamah leh inkalpawhna kawngpui siam kawnga a hnathawh pawh thui tak sawi tur awmin tunah hian Central sawrkarin Road connectivity atan tangka 200 vbc min rawn pe a, heta thawh tur kawngte chu PWD in an thlang fel tawh a ni, a ti. Media tehian kan hnate min chik ula, a tha lai puanzar i uar ang u, a ti a ni.

Workshop hi Pu Lalhmachhuana, President, MJA, Kolasib in a kaihruai a. Pu Lalsiama Fambawl, Dy. Director, I&PR chuan Practising Journalism tih hmangin zirtirna a pe a. Pu Vanlalrema Vantawl, Vice  President, MJA, Mizoramin Ethics & Freedom of Journalism tih hmangin zirtirna a pe bawk a ni. Pu C. Lalrambuatsaiha, President, MJA, Mizoram chuan khualzahawm niin thusawina hun a nei bawk a. MJA, Aizawl atangin hruaitu thenkhatin he hun hi an hmanpui bawk a ni.

Pu Lal Thanzara hian IPRO, Kolasib office building sak mek leh MJA office hmun tur a tlawh nghal bawk a. He workshop ah hian khaw hrang hrang atangin YMA aiawh 42 leh Kohhran news aiawh 30 an tel a ni.