Vawiin chhun dar 12:00 khan Assam-a Muslim te buaina chungchang leh chumi in nghawng a neih dante sawipui turin Home Minister chuan YMA leh MZP hruaitute a ko khawm a. He buaina kal zela India ram hmun hrang hranga North East miten buaina an tawh thuthang tam tak a awm karah Internet-ah thu dengkhawng tak tak lo ziak an awm leh midangte tithinrim thei tur zawnga tawngkam lo cheh an awm chu pawi a tih thu sawiin, chi leh chi inthliarna hawi zawnga tawng lo thlahdah an awm leh tlat thin chu pawi a tih takzet thu a sawi. Minister chuan India ram hmun tina hnathawk leh lehkha zira Mizo awmte sahimna ngaihtuaha theihtawpa hma lak a nih laia mi pawisawi zawng leh kan Mizo puite tan ngeia dinhmun hlauhawm siamsak thei zawnga lo tawng hi nghawng chhe zawk nei thei a nih avangin hetiang zawnga lo ti reng reng chu chhui zui a, ti tawh lo tura hriattir zel turin YMA leh MZP hruaitute chu a ngen a. He meeting a tel Home Department hotute pawh a tul ang zela hma lo la turin a chah nghal bawk. He meeting ah hian Pu Lalrinmawia Ralte, Parliamentary Secretary i/c Home Department bakah Home Secretary leh Police hotu lawkten Minister hi an tawiawm a ni.

Chawhnu dar 1:30 ah Aizawl-a Muslim Association hruaitute a ko khawm bawk a, Aizawl DC leh Police hotute an tel ve bawk. He hunah hian Muslim hruaitute chu buaina lian zawk thleng zel tur veng turin a lo chah a, India ram hmun hrang hranga an unaute pawh buaina a punlun zel loh nana hma la tlang tura ngen turin a lo hrilh a. North-East mite chunga thil tha lo a thlen lohna turin an theih ang anga an mite khap turin SMS te pawh lo thawn uar se a duh thu sawiin, buaina hian ziaawm lam a pan loh chuan anmahni tan ngei pawha a him loh theih thu a lo hrilh a ni. Chi leh chi inkara buaina awm hi kan ram tana thil pawi ber a nih theih avangin inlungrual tak leh theihtawp chhuaha mi zawng zawng inkara inremna siam hna thawk tura tanho a ngaihzia pawh a lo hrilh bawk a ni