Vawiin khan Central YMA buatsaih in Tuihna humhalh beihpui hawnna inkhawm Saikuti Hall, Lunglei-ah neih a ni. Pu S. Laldingliana, Parliamentary Secretary chu khuallian niin a hmanpui.He beihpui inkhawm hi Pu Johnny Zoramthanga, Vice President, Lunglei YMA Sub-Hqrs. in a kaihruai a ni.

Pu S.Laldingliana, Parliamentary Secretary chuan YMA member duhawm tak tak te hi Mizorama kan tuihna kangchat mek tihpunna kawnga theihtawp chhuah turin ka sawm tak zet che u a ni a ti. Mizote hi lehkhathiam hnam ni mah ila, chin tha lo tak mai kan neih chu, mahni ramngaw humhalh nachang kan hre tawk lo hi a ni. Thingtlang loneih kan bansan hleithei lo va, kan vah bak ngaw te kan ti kang hum hum a, kan lui tuite pawh tur leh hmanraw tha lo hmangin kan suasam thin a ni. Hei hian kan ecological balance nasa takin a ti chhe ta a ni. Thilsiam zawng zawngte hnena chanchin tha hriltu tur kan nihna ah hian kan chian a ngai a. Chuvangin, tun atang hian kan zavaiin tan ila thar ang u a ti a. Sawrkar Flagship programme NLUP awmzia pawh sawi fiah nghalin NLUP chuan tum lian tak pahnih a neih thu leh, mirethei chhanchhuahna programme a nih mai bakah 'Ram Hman Dan Thar" a nih anga kan ram leilung chhe mek chhanhimna leh siam tharna programme a a nihna kan hriat tel a tul thu a sawi tel bawk.

Pu Lalrothanga, Director, CCDU chuan PHE Department lamin tui chungchanga ram pum huapa hma an lakna te leh, kalphung pawimawh tak takte a tarlang a. Pu T.Sangkunga, Central YMA President chuan thuchah pawimawh tak mai a sawi bawk a ni. He hun hi session hnih-ah then a ni a.

Chawhnu hunah hian Lunglei YMA sub-Hqrs huam chhunga YMA group leh branch hrang hrang kalkhawmte hian Seminar/workshop neiin hemi kawnga inzirtirna hun hi an hman a ni.