3160/2024-2025

Dated Aizawl, the 23rd November, 2024: Vawiin khan Bharat Scouts & Guides Mizoram State Training Centre, Tanhril-ah Bharat Scouts & Guides North East Mini Jamboree vawi 8 na chu Chief Minister, Pu Lalduhoma, President, Mizoram Bharat Scouts & Guides ni bawk chuan a hawng.

Thu a sawinaah Chief Minister chuan, Mini Jamboree tel tura lo kal zawng zawng te kan lo lawm che u a. In cham chhungin hun nuam tak in hman ngei kan beisei.

Kan awmna ram bial te, kan tawng te leh kan nunphung te chu danglam mah se inrem takin kan chengho thei a, ram tan kan thawkho thei. Chu chu kan chakna hnar a ni. Tangruala hma kan laknaah chuan kan hlawhtling thin. BSG in a thiltum ber pawh tangruala India tha zawk din a ni, a ti. He Jamboree neih chhung hian thil hrang hrang in tiho dawn a. Scouts & Guides dintu Lord Baden Powell chuan, "Hlimna dik tak neih dan chu, midangte hlimna siamsak hi a ni" a lo tih ang khan, he hun tawiteah hian in thian thar te hlimna thlentu lo ni theuh ang che u, tiin a chah. Mini Jamboree tha taka buatsaihtu Mizoram Bharat Scouts & Guides te chungah lawmthu a sawi bawk.

Dr. KK Khandelwal, IAS (rtd), Chief National Commissioner, pawhin thusawiin, Chief Minister Pu Lalduhoman a telpui avangin lawmthu a sawi a. Mizoram Bharat Scouts & Guides te phur taka hma a lo lakpui thin dan kan hria a; BSG tana a thawhhlawk avang hian National Award sang ber Silver Elephant Award dawng turin kan thlang a ni, tiin Pu Lalduhoma hnena Silver Elephant Award hlan a nih tur thu a puang a. He Award dawng tura an rawtna DO letter hi Chief Minister a hlan nghal a ni. Lehkhaah hian Bharat Scouts & Guides a thawhpuina leh phurpuina vang te, thil tha ti tura thalaite nunkawng kaihruaitu leh tichaktu hruaitu tha tak a nih avang tea he chawimawina hi pek an duh thu a inziak. He award hi President of India in a hlan thin a, hun remchang hmasa berah Chief Minister hi hlan an tum ang.

Chief National Commissioner hian Jamboree hlawhtling tak buatsaihtu Mizoram BSG te chungah lawmthu a sawi a, ram pum huapa BSG hmalakna leh a hlawhtlinna chanchin te a tarlang bawk.

Pu H. Lalhmingthanga, Director of Sports & Youth Affairs, Mizoram State Commissioner, BSG ni bawk chuan palaite lawmna thu a sawi a, Pu Amar B. Chettri, Executive Director, BSG chuan Jamboree buatsaih chhan leh a thiltumte a sawi a ni.

Mini Jamboree hian November ni 28 thleng a awm dawn a. Hemi chhung hian thil chi hrang hrang an zirin an tiho ang. Tun tum hi Mizoramin North East Mini Jamboree a thlen vawi hnihna a ni a. India hmarchhak bik tana ruahman a ni nain state dang atanga rawn kal pawh engemawzat an awm a, mi 300 vel an kal khawm a ni.