3161/2024-2025

Dated Hnahthial, the 22th November, 2024: Vawiin khan Hnahthial District chu Adv. George Kurian, Minister of State for Minority Affairs, Fisheries, Animal Husbandry and Dairying chuan tlawhin Hnahthial District-a office hotute kawmna a nei a, District chhunga central scheme hmanga hmalakna hrang hrang awmte chu a tlawh kual nghal bawk a ni. Union Minister of State, Adv. George Kurian hi Bawrsap Pi Rita Lalnunmawii Pachuau leh District chhunga officers ten an lo dawngsawng a ni.

Pu George Kurian-a chuan chawhnu dar 01:30 khan Hnahthial District chu Rallangtlang helipad-ah rawn thlengin Horeb Lodge Conference Hall-ah Hnahthial District office hotute nen inkawm hona an nei a. He hunah hian Pu George Kurian-a chuan office hotute nen zawhna leh chhana hun hmangin department hrang hrangte hnen atangin Hnahthial District chhunga sawrkar laipui hmalakna (Central Scheme), a bikin Pradhan Mantri Awas Yojana (PMAY), Jal Jeevan Mission(JJM), Mid-day Meal, Kisan Credit Card (KCC), Ayushman Bharat leh Agriculture leh Fisheries Ministry hnuaia Scheme hrang hrang kalpui dan te zawt chiangin sawi hona a neihpui a. Pu George Kurian-a chuan central scheme kalpuina kawnga tithuanawpthei thilte bakah an hmalak leh zelna atana an mamawhte chu ngaihthlak sakin infrastructure lamah Hospital leh College ten mamawh an neihte a zawt a. Government Hnahthial College-ah Arts stream chiah a awm chu pawi a tih thu sawiin Science stream hawn theih nan central lam atangin funding a awm theih thu a tarlang a. Department hrang hrangte chuan an mamawhna theuh te thlenin Pu George Kurian-a chuan an harsatna leh mamawhna te chu a chhinchhiah thu leh a theih anga hma laksak a tum thu a sawi a ni.

Officials te nen inkawm hona a neih zawh hnuin Minister of State chuan Anganwadi-cum-crèche tlawhin a hmunhma te a enfiah a. Animal Husbandry & Veterinary building tlawh leh nghalin AH&Vety hotute hnen atangin Hospital lab an mamawhnate a ngaihthlaksak hnuin Pu George Kurian-a chuan an mamawhte chu chipchiar zawka rawn thlen turin a ti a ni. Hnahthial District Hospital hmunhma te enfiah bawkin Hospital-in pathologist bakah an mamawh dangte chu a ngaihthlaksak a. Hemi zawh hian Leite a Jal Jeevan Mission hnuaia Solar Pump House sak chu tlawhin solar pump hmanga in 198 an chawm thei chu lawmawm a tih thu leh Jal Jeevan Mission an kalpui dan hrim hrim chu fakawm a tih thu a sawi a ni. Solar Pump a enzawh hnu hian insak tanpuina, Pradhan Mantri Awas Yojana – Urban (PMAY-U) hnuaia sak, Pu K. Lalchhuanawma, Lunleng Veng in chu a endik bawk a ni.

Krishi Vigyan Kendra (KVK) complex ah lo hmuah niin hetah hian khuallian chu Govt. Southern High School Boys Pipe Band performance leh Cheraw kan hmangin lo lawm a ni a. Hetah hian stall exhibition hrang hrang - Agriculture, Sericulture, AH&Vety, ICDS, Horticulture, Fisheries Dept, MHIP, MzSRLM leh adt hnen atanga neih a ni.

Union Minister of State, Adv. George Kurian-a hi Hnahthialah zanin chamin naktuk zing dar 08:30-ah helicopter hmangin Lengpui Airport a pan ang a. Hemi zawh hian Delhi lam panin a kal ang.