Vawiin khan Chief Minister Pu Lal Thanhawla’n Synod Conference Centre ah State level a lawmman sang ber pek theih, Mizoram Bharat Scouts & Guides Rajya Puraskar Award 2013-2014 dawngtu mi 102 hnenah Mizoram Bharat Scouts & Guides President anihna angin Certificate a hlan.

Chief Minister chuan Scouts & Guides te chu mi invawng, hawihhawm, thuawih thei, aia upate zah nachang hria an ni thin a ni a ti a.Khawtlang thatna tur leh ram hmasawnna tur pawhin mi tangkai leh pawimawh tak an ni a ti. Chief Minister chuan tunlai hi thalaite khawvel a ni tiin, an zinga Scouts & Guides te anga mi tha leh tangkaite chu nakin lawka kan ram hruaitu tur an ni thei a ni a ti.

Mizoram Bharat Scouts & Guides hotu ten thahnemngai taka a movement an kalpui chho zel hi thil lawmawm tak a ni Pu Lal Thanhawla chuan a ti a. Training an neih thin ah taimakna leh kuthnathawhte an zir tel thin hian khawtlang tan tangkaina leh hmasawnna a ni a ti a.Thianghlimna kawngah pawh a movement atang hian zir tur tam tak a awm thu sawiin, a tak a nunpui chi a ni a ti. Hnam hrisel ni tur chuan naupan tet atanga thianghlimna kan zir a tul a, chuvangin kan hriselna tichhe theitu lakah kan fihlim a ngai a ni a ti.Scouts & Guides movement hi inthununna dik kan neih theihna turin chak lehzual a kalpui tul a tih thu a sawi bawk a ni.

Mizoram Bharat Scouts & Guides hi kum 1932 khan Serkawn, Lungleiah bul tan a ni a. Tunah Mizoram pumah mi 8000 vel awm anga ngaih a ni. Scouts & Guides din tur hian schoola zirtirtu scouts & guides lama trained chhuakin a bul tanna turin thla ruk chhung naupangte hnenah ‘pravesh’(recruit) ni turin a train hmasa phawt ang a, chutah ‘pratham sopan’ ah chho leh anga, chutiang zelin ‘dwitiya sopan’ ah, chumi atangin ‘tritiya sopan’ ah kai chho lehin, chuta tang chuan a sang ber ‘Rajya Puraskar’ award an dawng thei a ni.

Vawiina Rajya Puraskar award dawngtu Mizoram school hrang hrang atangin Scouts 35 leh Guides 67 te hnenah Chief Minister hian a hlan a. Tunah hian he award dawng tawh zawng zawng chu Scouts section ah 533 leh Guides sectionah 719 an ni a. State level award aia sang chu national level a ‘Rastrapati’ award a awm a ni.

Award hlanna inkhawm hi Mizoram Bharat Scouts & Guides State Chief Commissioner Pu Lalzirmawia Chhangte in a kaihruai a ni.