2216/2025-2026

Aizawl the 14th November 2025: Vawiin khan Chief Minister Pu Lalduhoma chuan Bible Society of India Aizawl Auxiliary BIBLE HOUSE thar, Raj Bhavan bul Khatla venga mi chu a hawng.

A hawnna inkhawm hi building thara BSI Hall-ah neih zui a ni a. He hunah hian thusawiin Chief Minister chuan, leilung chhiatna avangin kum 25 zet hlim taka in lo luah tawh kha thiah a lo tul ta a. Mittui nen in thlah liam a nih kha. Synod Conference Centre ah te, Salvation Army Territorial Headquarters ah te in insuan kual zak zak a, kan lainat hle che u a ni. Vawiinah erawh chuan building thar tha tak leh mawi loh tak in lo nei leh ta a. Ka lawmpui che u a, ka hlim hle a ni.

Building thar in neih theih nan hian Mizoram sorkar pawhin theihtawp a chhuahpui thin che u a. Anmahni hun theuhah eng sorkar pawh khan a ngaihsak che u a, ngaihsak pawh in phu reng a. Keini pawh in tan kan inhawng em em a ni.

Zofate zinkawng kan chhuilet chuan Pathianin a rawngbawl turin min thlang tih a hriat theih. Missionary te an rawn awm tan atanga kum 15 chhung velin Zo hnahthlak hnam hlawm lian zawng zawng zingah chanchintha a thleng deuh vek a, kum 50 chhungin a hnam pumpuiin kristian kan ni zui ta a ni. Kan ram hi han thlir ila sakhaw lian pathumin min hual bawk a. Chung mite karah chuan Zofate hian chanchintha meichher hi eng taka kan chhit a ngai a. Bible Society hi kan zaa min huapzo hmalakna a nih avangin a hlu bik a, kan khawpui lailia Bible House mawi tak a awm pawh hi a inhmeh hle ni, a ti.

Bible House hi kum 2016 kha a awmna lei a khi a, a thlanga sorkarin hma a lakna nghawng zel nia ngaih a ni. Mithiamten an endik hnuah thiah a ngai tih hriat a ni a, an thiat ta a. A hmunhma chu tuna a building thar awmna nen hian sorkar nen an inthleng a, sorkarin zangnadawmna Rs. 407 lakh a pe bawk a. Member te thawhkhawm belh te nen he a building thar hi Rs. 1400 chuang sengin sak a ni ta a ni. A hnuah sorkar hian Rs. 50 lakh a pek belh leh bawk. Kum 2019 August ni 5 ah a bankhur laih tan niin vawiin hian hawn a ni ta a ni.

A lawmna inkhawmah hian Rev. Dr. Vanlalnghaka Ralte, President, Aizawl Auxiliary chuan kalkhawmte lawmna thu a sawi a. Rev. Dr. Kavito G. Zhimo, General Secretary, BSI chuan building hlanna a nei a, Rev. Dr. Leelavathi Vemuri, President, BSI pawhin chibai bukna a nei bawk.

Aizawl Auxiliary hnuaiah hian branch 55 awmin Mizoram, Tripura leh Barak Valley-a district pathum a huam a, kohhran hrang hrang sawmthum an thawkho mek a ni.