2217/2025-2026

Aizawl the 14th November 2025: Vawiin khan Vanapa Hall-ah 72nd All India Cooperative Week hman a ni a. Chief Minister Pu Lalduhoma chuan a hmanpui a, Pu PC Vanlalruata, Cooperation Minister chu khualzahawm a ni.

Thusawiin Chief Minister chuan, member-ten hlawkna an hmuh tlan theih nana inthuruala hmalakna, inlaichinna tha tak nei chunga thawhhona hi Cooperative nihphung chu a ni a. Chutiang hmalakna kalpui tur chuan Mizote tluka tha hi khawvel ram dangah an awmin a rinawm lo.

Kan pi leh pute hun ata khawsakho thiam tak, thawhho thiam, mimal tana hna harsa leh lian tham tinreng hnatlanga thawk thin kan ni. Kan eizawnna lamah pawh Cooperative kaltlangin kan thawkho thei ang tih hi rinhlelh tur a awm lo va. Hmakhaw eng tak kan nei zawk a ni.

Federation kan neih that sa - MULCO, MAHCO leh MAHFED ten hma rawn hruai ula, huapzo hmalakna, member zawng zawngte phur taka kan kal theihna i uar ang u.

Hmathlir fel tak neia kal a tha a, MULCO hian in tina lut thei tharchhuah neih lo tum tlat se, MAHCO Mizo puan hi India ram pumpui hriat khawpa dinchhuah tum ila. Chutiang bawkin MAHFED pawhin kan ram tharchhuah thei leh thlai phochhuah tur tam tak kan neih bakah kan mipui tam zawkte hi kan thawhpui theih eizawngtute an ni tih hriain, hlawhtling ngei tur hmalakna i kalpui ang u.

Sorkar pawhin kan society leh MSME te siamchhuah thilte kan ngaihlu a, sorkar office bungrua leh hmanruate thlak an lo tul hunah, kan ram siamchhuah, Mizo kutchhuakte ngeia thlak zel tum tur a ni – tiin thuchhuah kan siam a. Dan ang taka kalpui theihin kumin February ni 25 khan “The Mizoram Procurement Preference Policy for Small & Medium Enterprises 2025” chu Gazette a ni zui ta a ni, a ti.

Chief Minister hian Week pual special Souvenir a tlangzarh a, Society tha thlanchhuah pathumte hnenah lawmman a hlan bawk a. Lawmman dawngtute chu:

Pakhatna - Khanpui MPACS
Pahnihna - Tualte MPACS
Pathumna - Saipum MPACS, te an ni.

Kum 1954 atang khan All India Cooperative Week hi kum tin 14-20 November chhungin hman thin a ni a. Cooperative movement tih chak lehzual nana buatsaih a ni. Kumin hi United Nations-in International Year of Cooperatives atana a puan angin Cooperative Week pawh hi kum dang aia urhsun zawka hman a ni.

Week hawnna inkhawm thawh khatna hi Pu John LT Sanga, MCS, Registrar of Cooperative Societies, Mizoram in a kaihruai a, Pu K. Lalchamreia, President, Mizoram State Cooperative Union in hunserh a hmang a, Pu PC Vanlalruata, Minister leh Pu Udit Prakash Rai, IAS, Commissioner & Secretary, Cooperation Department ten thu an sawi bawk.

Mizoramah hian primary cooperative society 1500 chuang leh state level cooperative federation/union 13 an awm mek a ni.