2218/2025-2026

Aizawl, 14th November, 2025 : Nimin khan Tuirini Hydel Project in a chhehvel khaw mipuite a nghawng dan tur zirchianna Social Impact Assessment study neih mekah mipui ngaihdan lakna leh he project chungchang inhrilh chianna hun Seling YMA runah Seling VC te kaihhruaina hnuaiah neih a ni. He hun hi Pu R. Lalremsanga, Director SIRD&PR chuan hmanpuiin, he thil hi Mizoram tana thil hlu leh ṭangkai tak a nih theih dân te sawiin mipui te pawhin rilru zau taka lo dawngsawng turin a chah a ni.

He hunah hian Er. Daniel Lalrengpuia, Sr. Executive Engineer, P&E te, Dr. K.T Pakhuangte, Associate Professor, SIRD&PR ten mipuite hriat tur pawimawh an sawi a. Seling khaw mipui an kal khawm ṭha hle a, Tuirini khuah chungchanga an ngaihdan te sawiin an hriat duh pawimawhte an sawi bawk a ni. A tawpah mipuite ngaihdan lain mipui kal khawm tam zawk hian Tuikhuah hi an remti a ni. He project hi New Development Bank, Shanghai atanga pawisa puk Rs. Vaibelchhe 660 chuang hmanga thawh tur niin sum hman zà a 80 hi Central sorkar rulh tur niin zà a 20 hi state rulh tur a ni ang.