2219/2025-2026

Lunglei, 2025 Sahmulphah thla ni 14: Vawiin khan Mizoram State Legal Services Authority (SLSA) leh All Mizoram Elected Women Representatives (AMEWR) ṭang kawp huaihawtin Lunglei Convention Centre-a LMC Auditorium-ah Lunglei District-a rorel khawla thlan tlin hmeichhia (elected women representative)-te tana National Legal Services Authority (NALSA) Scheme zir hona leh intuai tharna, "Special Campaign on Schemes of NALSA & Capacity Building & Leadership Training" buatsaih a ni a. Lunglei High Powered Committee (HPC) Vice Chairman Pu V. Malsawmtluanga chu Khuallian niin, Lunglei Municipal Council (LMC) Vice Chairman Pu K. Lalrinawma chu Khual Zahawm a ni.

Khuallian Pu V. Malsawmtluanga chuan VC/LC member-te chu mipui ngheng lehzuala thawk an nih angin an pawimawh hle tih sawiin, mipui ai awha thlan tlin hmeichhiate chu an chhuanawm a tih thu a sawi a. Lang tlang sawrkara pawimawh ber chu dan zawm leh dan anga kal a nih thu sawiin, ram leh khawtlang hruaitu tan rorelna kawngah dan anga kal thei turin ram dan hriat a ngai a, dan hre lova rorel chuan mipui hruai sual leh dan kalha chet palh a awm thei, a ti a. Khawvel ṭhang zel milin dan siam thar leh siam rem a ṭul ṭhin a, dan thar a chhuak zel a, inzir peih a pawimawhin, intuai thar zel a ṭul tiin, thiamna sang zel leh khawvel changkang zel mila insiam rem a, hmasawn zel turin thlan tlin hmeichhiate chu a chah a. Tun sawrkarah hmeichhe pual bika budget ruahman, "gender budget" dah a ni leh Mizorama hmeichhe Cabinet Minister hmasa ber ruat a ni chu sawrkarin hmeichhiate a ngaih pawimawhzia tar langtu a nih thu sawiin, thlan tlin hmeichhiate'n an mawhphurhna ṭha taka an hlen chhuak ṭhin chu an chhuanawmin an entawn tlak hle a ni, a ti a. Thlan tlin hmeichhiate chu hmeichhe dinhmun chawi sang a, an chanvo leh dikna humhalh tur te, hmeichhe chanvo hman sual theih laka inveng tur tea mahni hmeichhepuite zirtir leh fuihtu ni tur te, an theihna hai lana a awm theih nan huaisen taka ke pen a, ding nghet tlat tur leh hma sawn zel tum a, mahni hmeichhepuite chawi san zel tum turin a chah.

Khual Zahawm Pu K. Lalrinawma chuan mipui ai awha thlan tlinte pawimawhna tilang tur leh dan hnuaia an chanvote hria a, an chanvo an hmuh theih nana bei zel turin thlan tlin hmeichhiate chu a chah a. VC/LC chu mipui nena inhne hnai ber an nih angin state, district leh municipal te nena hna thawhnaa kailawn pawimawh ber an nih thu sawiin, khawtlang hruaitu ṭha chu khawtlang tan leh anmahni thlang tlingtu mipuite tan malsawmna an nih thu a sawi a. Ṭhalaite, chhungkua leh ram tibuaitu ruihhlo do tlang a, khawtlang hmasawnna tura NGO leh kohhrante nen thawk ho thiam tura chahin, mipui ai awhtute chu party hrang hrang aṭanga thlan tlin ni mah se, ram leh khawtlangin hma a sawn theih nan party tan ni lo va, ram tan thawk ho thiam turin a chah.

AMEWR President Pi R. Zomuanpuii'n hun kaihruaiin, inlawmna thu a sawi a. Sawrkarin ram leh khawtlang rorelnaa hmeichhiate chanvo bil (reserve seat) a hauhsak chu lawmawm a tih thu leh chanvo ṭha zawk an hmuh theih nan theih tawp an chhuah zel tur thu sawiin, rorel khawla hmeichhe pawimawhna leh theihna lan chhuahtir a, hmeichhe dinhmun chawi sangtu ni zel turin thlan tlin hmeichhe kal khawmte chu a chah a. Lunglei District-ah mipui ai awha thlan tlin hmeichhia AMEWR-a inziak lut 110 vel an awm thu a tar lang bawk.

He hunah hian LMC-a thlan tlin hmeichhe councillor-te chawimawina leh lawmpuina hlan a ni a. LMC Executive Councillor Pi Lalhruaitluangi Sailo pawhin fuihna thu sawiin, AMEWR Finance Secretary Pi Lalremsangi Fanai chuan lawm thu a sawi.

Chawhnu lamah dan lam leh thil pawimawh hrang hrang zir hona hun buatsaih zui a ni a. Public Prosecutor-cum-Government Advocate Pu Malsawmdawngliana'n "Dan leh hrai pawimawhna leh Legal Services Authority hna thawh" tih thupui hmanga zirtirin, Lunglei Deputy Superintendent of Police (Headquarters) Pi C. Ramnunmawii'n "Dan leh thupek ken kawhnaa hriat tur pawimawh" tih thupui hmangin a zirtir thung a. SIRD&PR Extension Training Centre Principal Pu Malsawmtluanga Fanai chuan "Khawtlang rorelnaa thlan tlin hmeichhiate mawhphurhna" tih hmanga thu sawi bawkin, zawhna leh chhanna leh sawi hona hun hman a ni bawk.