2742/2026-2027

Vijayawada the 19th October 2026: Vawiin khan SS Convention Hall, Vijayawada, Andhra Pradesh-ah Bible Society of India, Andhra Pradesh Auxiliary chuan an kum 75-na (Platinum Jubilee) an lawm a, Chief Minister Pu Lalduhoma chuan khuallian niin a hmanpui a, Jubilee lungphun a hawng.

Thu sawiin Chief Minister chuan, Andhra Pradesh-a christian-te chu Mizoram mipui aiawhin duhsakna chibai a buk a. An state-a Bible Society of India-in kum 75 chhung tha taka hna a thawk thei hi Pathian thatzia leh he state-a ringtute rinawmzia tilangtu a ni, a ti.

Bible hi Mizorama eng rawn chhi luttu, rinna chauh ni lo, zirna leh khawtlang nun dan tha te, midangte tana inpekna te inunauna leh thawhhona thate min zirtirtu a ni a. Khua leh tui tha ni tura nun dan thate min hrilh a. Chuvangin miten Bible an chhiar a, an nunkawng kaihruaitu atana an hman hian khua leh tui tha an nih phah thin. 

Mizoramah chuan sorkar, kohhran leh Bible Society, Aizawl Auxiliary-te inpawh takin kan thawkho a, nikum November ni 25 mai khai Aizawlah Bible House ka hawng a, Bible House sak nan hian sorkar chuan Rs. 407 Lakh a thawh nghe nghe a ni. A hawnnaah khan BSI President, Andhra Pradesh mi Rev. Dr. Leelavati Vemuri pawh hi a rawn tel a, kan lawm hle.

Andhra Pradesh-ah hian kohhranhote Bible Society kaltlangin in thawkho tha tih ka lo hria a, India rama Bible hralh tam ber leh khawvel huap pawha a titha sawm zingah in tel bawk a. In hmalakna hi a entawntlak hle a, in rawngbawlna hi a ropui a ni. Bible thehdarh hna chauh thawk lovin rawngbawlna dang pawh in kalpui a, tlem laia Manipura harsatna tawk kan unaute tana Rs. 17 lakh lai in thawhkhawm te, nangmahni ngei rawn kala in rawn tanpui a, in rawn thlamuante kha a ropui ka ti hle a ni.

In hnathawh tha tak hi lo chhunzawm zel ula, kan fate, thangthar lo awm zel turte hi ringtu tha takah leh khua leh tui tha i siam zel ang u. Kum 75  chhunga he Auxiliary tana thawktute zawng zawng chungah lawmthu ka sawi a. Vawiina kan thlen chinah hian duhtawk mai lovin hmasawn zel turin i inbuatsaih sauh sauh ang u, tiin a chah a ni.

Andhra Pradesh Auxiliary hi Aizawl Auxiliary dawta Bible Society tana thawhlawm thawh hnem ber an ni thin a. Tuna Bible Society of India President ni mek Rev. Dr. Leelavati Vemuri hi Andhra Pradesh mi a ni. Telegu Bible hi India rama Bible hralh chhuah hnem ber leh khawvel huapa hralh tha sawm zinga mi a ni. 

He hunah hian President Rev. Dr. Leelavati Vemuri, President, BSI te,  Bishop K. Pratap Sinha, President, Andhra Pradesh Auxiliary te leh Bible Society of India hruaitu dangte pawhin thu an sawi a ni.