Nimin tlai khan Pachhunga University College Seminar Hall-ah Mizoram a nungcha, thing leh mau thliar hran fel leh chhinchhiah chungchangah, Seminar on Challenges in Bio - Systematics in Mizoram chu buatsaih a ni a. He hun hi Chief Minister Pu Lal Thanhawla'n a hmanpui a; Life Science huangchhunga Mizo Scientist titha te hnenah chawimawina a sem nghal a ni.

Chief Minister Pu Lal Thanhawla chuan zirlai seminar chhimtute hmaah thusawiin Biodiversity-ah Mizoram a hauhsak zia tunhnaiah hriatchian a nih chauh thu a sawi a. Hlawkpuina tura hman tangkai dan zirkawngah tuna zirlai leh mithiam te tan hmalakna khua a tlai rih lo nia a ngaih thu a sawi a.

"Kum 20 chuang ram a buai chhung khan rampawn lammite, biodiversity a kan state hauhsakna hrechiangtute khan, kan ram chhunga thilhlu chitin reng - nauban vang ber ber chi, thingrai, ramhmul damdawi hrang hrang te kawng hrang dapin an ru chhuak nasa hle a. Thingtlang chu sawiloh khawpuiah pawh khang thil hlutna hria leh humhalhna chang hria kan awm manglo kha a pawi takzet a ni", a ti a. Humhalh dan tur ruahmanna leh zirchianna neih a District khawpui hrang hrangah te thangthar, Mizoram hmabak te hnenah, ramdang mi ten kan thilhlu min rawk fo tawh lo nan, zirtirna pek pawimawh a tih thu a sawi a.Chumi kawnga hmalakna ah chuan tlawmngai pawl thawhhlawk tak, YMA leh a thawhpui te puihna leh phungbawm a sawt hle in a rin thu a sawi a ni.

Chief Minister chuan Mizoram awmna hmun chu thlai leh thei chitin reng thatna, ramngaw pawh chak taka insiam leh theihna hmun a ni a. Chu thil danglam bik chu a chhunga chengte vanneihna a nih thu a sawi a. A humhalh tur leh a hauhsakna chhawr tangkaia hlawkpui nana hmang tur chuan thawhrimna a hmuhchhuah a ngai a. Chu chu Zoram thalai thluak tha tak tak te tana chona a ni a ti a. " Pathian in ram min pek, thlai chitin reng that theihna hmun, khawvel a thei leh thlai manto ber ber chin theihna hmun hi rinawmna, dikna leh taihmakna nen thawkin state hausa leh intodelh a siam hi kan vai mawhphurhna a ni", a ti.

Seminar on Challenges in Bio - Systematics in Mizoram hi Directorate of Science & Technology, Mizo Academy Of Science leh Pachhunga University College tangkawpin an buatsaih a ni a. He hun hi PUC Principal Dr. Tawnenga'n a kaihruaia, Official atangin Dr.R.K.Lallianthanga, Chief Scientific Officer, S&T, Dr.K.Lalchhandama, President, Mizo Academy of Sciences leh Dr. H.Lalthanzara, PUC Project Committee ten thusawina hun an hmang a. Scientist pathum - Dr. Lalramliana, PUC, Dr.John Zothanzama, MZU leh Dr. HT Lalremsanga, MZU ten an hnathawh, thil hmuhchhuah leh hlawntlinna a lem nen powerpoint hmanga tarlan leh sawifiahna hun an hmang.

He Seminar-ah hian Mizoram chhunga rannung, thlai leh hnim hnah chi 30 khawvelin a la hriatchian loh leh chhinchhiah loh hmuchhuak tute zinga Scientist 14 te - H.Lalthanzara, Lalramliana, HT Lalremsanga, Saipari Sailo, VL Hrima, John Zothanzama, Samuel Lalronunga, Lalnuntluanga, Beihrosa Solo, Denis Val Lalhlimpuia, Vanramliana, Laltlanhlua Zathang, Lalrotluanga leh H.Lalramnghinglova te hnenah chawimawina thilpek Chief Minister Pu Lal Thanhawla'n a hlan a. Rannung chhinchhiah thar te hi sangha chi hrang hrang, rulhut, changpat, uchang chi hrang hrang, pa chi thar, leh sawhthing lam bulbal nei chi te a ni.