Mizoram State Council for Child Welfare in naupang kum 18 hnuailam tan Painting Competition vawiin khan DIET Auditorium, Chaltlangah buatsaihin lawmman sem nghal a ni a, Pu PC Lalthanliana, Minister Social Welfare Department in a hmanpui.

Pu PC Lalthanliana chuan Sorkarin naupangte hamthatna a ngaihpawimawh thu sawiin, painting competition pawh hi naupang talent phochhuahna hun atan leh tihhmasawnna a tana duan a ni a ti a. Naupang te dikna chanvo humhim a nih lehzual nan Mizoram State Commission for Child Rights chu din a nih dawn thu a sawi a. Tunah hian kum 16 hnuailam ten school chawlhlai leh kalloh laia an thiamthil an tah hriamna tur Bal Bhavan pawh buatsaih mek a nih thu a sawi a. Minister chuan painting competition a tel naupangte an themthiamna tipung zel tur a fuihin duhsakna a hlan a ni.

Vawiin painting competition-ah hian naupang 86 an tel a. Lawmman pakhatna in Rs.3000/-, pahnihna Rs.2500/-, pathumna Rs.2000/- leh thuziak bakah consolation price Rs.500 pek a ni bawk a. Lawmman te hi Pu PC Lalthanliana, Minister leh Pi Vanlalsawmi, Kulikawn ten an tum a ni.

Vawiin a National Painting Competition buatsaih hi Indian Council for Child Welfare, New Delhi in India ram pum huap naupang kum 5-16 inkar te tana buatsaih tur a ruahmanna a siam angin, Mizoramah Mizoram State Council for Child Welfare (MSCCW) hian painting competition hi a buatsaih ta a ni. Competition a tel naupang te hi an kum milin group 5 ah then a ni a, kum 5-8 Green Group, kum 9-12 White Group, kum 12-16 Blue Group te an ni a. Hei bakah hian Special Group awmin, group 2 ah then leh a ni a, kum 5-10 Yellow Group leh kum 11-18 Red Group te an ni. Group tin tan hian Theme hrang theuh siam a ni a, theme hi rampum huapa inanga siam a ni. Group tin atanga 1st - 3rd prize thlan chhuah te hi New Delhi-ah thawn a ni anga, State tin atanga thlanchhuah atangin National Level lawmman dawng tur thlan chhuah leh a ni ang. Lawmman hi tangkafai 1st Prize - Rs.5000/-, 2nd Prize - Rs.3000/- , 3rd Prize - Rs.2000/- leh medal, citation leh Scholarship Class XII an pass thlengin an dawng dawn a ni.

Vawiin hun hi Pu JC Japanruna'n kaihruaiin, Pi Lalzarliani, General Secretary, MSCCW competition neihdan te a sawi a ni.