Vawiin khan Chief Minister Pu Lal Thanhawla'n Secretariat Conference Hall, New Secretariat Complex ah Sawrkar Laipuia Department of Biotechnology leh Mizoram Sawrkara Directorate of Science & Technology tangkawpte buatsaih, Biotechnology lama hmalakna leh ruahmanna te sawihona 'High Level Discussion on Biotechnology Initiatives in Mizoram' tih chu a hmanpui.

Chief Minister Pu Lal Thanhawla chuan Biotechnology-a hmasawnna leh thiamna te engtin nge Mizoramin kan tangkaipui ang tih ngaihtuahna hmanga mithiamte intawhkhawmna, a vawikhatna atana buatsaih chu lawmawm a tiin Mizoram tan hmasawnna a thlen ngei a rin thu a sawi a. Science lamah Mizoramin hmalakna tur kan ngah a, Biotechnology leh kawng hrang hranga a hman tangkai dan a bik takin agriculture leh industries lamah kan hmelhriat chhoh mekah, he thilah hian hmabak pawh kan ngah hle a ni, a ti a. Biotechnology chu kan university leh zirna in sang zawk tan chona lian tak a nih thu a sawi bawk.

Chief Minister chuan Hmarchhak bial chu ramngaw, nungcha leh ramhmul damdawi ang chi 'bio resources' ah te leh biodiversity ah kan hausa a, Mizoramin kan buh leh thlai tha ramdanga awm lo ang chi, nauban te, mau leh hrui hnang te humhalh, tihpun leh khawvel hmelhriattir turin mithiamte leh university te chu Department of Biotechnology thiamna hman tangkai dan nen thawhhona kawng dap turin a chah a. Sawrkar economic policy thar - NEDP ah Biotechnology thiamna hmanga tharchhuah tihpun leh ramngaw, buh leh bal, thei leh thlai hausakna 'bioresources' tangkai leh hlawk zawka hman leh sawngbawl kawnga dinhmun pawimawh tak a neih theih thu a sawi lang bawk a ni.

He meeting pawimawh tak a awm theih nan a hma latu Rajya Sabha MP leh Member Parliamentary Standing Committee on Science, Technology & Environment, Pu Ronald Sapa Tlau inpekna chu Chief Minister chuan lawmawm tiin he meeting a tel tura lokal Department of Biotechnology-a Adviser leh a thawhpui mithiam dangte hnenah lawmthu a hrilh a. Mizoramin Biotechnology a taka a chhawr theih nan theihtawp chhuahpui turin mithiamte hi a sawm bawk a ni.

Meeting ah hian Pu H. Liansailova, Vice Chairman, State Planning Board; Pu K.S. Thanga, Parliamentary Secretary leh Pu Ronald Sapa Tlau, MP Rajya Sabha te pawhin thu sawiin Mizoram hmasawnna leh dinhmun chawikan nan Biotechnology hman tangkai a pawimawh thu te an tarlang a. Pu Ronald Sapa Tlau chuan Bamboo & Tissue Culture hmunpui Mizorama din a nih theih nan ngaihtuahna a awm mek thu leh Mizoram leilung mila apple tui chi IHBT mithiamte puihna in Champhai District a khaw 10 ah, kung 500 vel chin chhin a nih mek thu te a tarlang a ni.

Meeting hi Dr. Vanlalremsanga, Secretary, Planning(Science &Technology) in a kaihruai a, Dr. R.K. Lallianthanga, Chief Scientific Officer, Directorate of Science & Technology chuan lawmthu sawiin hun a khar a ni.

Vawiina meeting ah hian Department of Biotechnology-a Adviser Dr. Mohammad Aslam; Principal Scientific Officer, Department of Biotechnology Dr. Omkar Tiwari; Dr. Sanjay Kumar Mukherjee, Director, Council of Scientific & Industrial Research - Institute of Himalayan Bioresources Technology (CSIR-IHBT), Palampur, Himachal Pradesh; Prof. Dinabandhu Sahoo, Director, Institute of Bioresources & Sustainable Development (IBSD), Imphal leh a thawppui scientist Dr. Albert Chiang te an tel a ni.

Meeting zawh hian chhawng hnihin mithiam ten hemi chungchang sawiho, puanzarna leh thlirhona 'Brainstorming Session cum Interactive Meeting' an nei nghal a. Session khatnaah hian Directorate of Science & Technology, Horticulture Department, College of Veterinary Sciences & Animal Husbandry, Selesih, Agriculture Department leh Environment, Forests & Climate Change Department leh Fisheries Department a mithiam ten Biotechnology Initiatives leh a dinhmun leh hmalakna tur duan 'Future Plan' chungchang te sawiin presentation an pe a. Session hnihnaah Department of Biotechnology, Pachhunga University College, Department of Biotechnology, Mizoram University; AH & Vety. Department; Industries Department; ICAR Kolasib, Directorate of Hospital & Medical Education leh Department of Botany, Pachhunga University College a mithiam ten hemi chungchang hi sawiin presentation an pe bawk a ni.

Attachment

  • Loading attachment...