Vawiin chawhnu khan Mamit D.C Conference Hall-ah Pu H. Lianzela Addl DC, Mamit hovin Cable TV digitization kalpui meka hmalak zel dan tur chungchang ngaihtuahin meeting pawimawh tak neih a ni.

Meeting kaihruaitu Pu. H. Lianzela chuan Mamit District huam chhunga Cable T.V Operator (LCO) te chu theihtawp chhuaha hun tiam chhung ngeia Set Top Box (STB) bun fel tura hrilhin, thingtlang phase -IV huamchhung bik atan September 15, 2016 chhunga lo peih hman ngei a ngaihthu a tarlang a, awlsam zawka mipui mimir ten STB an neih vek theihna turin installment a pawisa pek dan ruahman sak turin Local Cable Operator (LCO) te a ngen nghal bawk. DC Office atanga monitor a awlsam zawk nan kartin report DC hnenah pek thin ni se tih a ni bawk.

Mamit leh Zawlnuam town chu nikum December ni 31 thleng hun pek an lo ni tawh a, July ni 10, 2016 chhunga STB nei vek tur a hmalak ni se, hemi hnuah hi chuan analogue signal pawh tihtawp zui ni se tih a ni. LCO ten an tarlan danin STB stock chungchangah harsatna an nei lova, a tul dan a zirin installment a pek pawh an in huam thu meetingah hian an sawi bawk a ni.

Cable TV Digitization kalpui hi India rampum huapa hmalakna anih avangin mipui te pawhin lo hrethiam a STB arang lama vuah theuh turin Addl DC hian mipuite a ngen a. LCO te chu digitization kalpui kawnga mipui tena harsatna an thlenna tur hmun, man chawi lova biak theihna phone no leh mipui tena digitization awmzia an hriatthiam theihna tura atam thei ang bera puangzar tura hriattir an ni bawk.

Meetingah hian Mamit District chhunga Local Cable Operator thahnem tak te, YMA Sub Hqrs aiawh, Mamit District Consumer Forum aiawh te bakah SDC, Gaston Vanlalhriatpuia leh DIPRO, Mamit te an tel a ni.