Vawiin, World No Tobacco Day hmanna inkhawm, Chanmari YMA hall-a Mizoram State Tobacco Control Society in a a buatsaihah Chief Minister Pu Lal Thanhawla chuan vaihlo khu laka nunna chhanhimna beihpui, Blue Ribbon Campaign bultanna a hawng.

Chief Minister chuan vaihloa eizawnna, tobacco industry hi hlawkna chauh ngaihthuah thin, vaihlo tur atanga tui taka ei theiha thil siam a, thehdarha an hralh hian mihringte hriselna nasa taka a tichhia a, an huathlala awm em em a ni a ti a. Hetiang thil siam hi ngaih theih (addict) anih avangin, abikin thalaite tan fimkhur hle a ngai a ni a ti. Blue Ribbon Campaign ina a tum, vaihlo khu laka nunna chhanhim (saving lives from secondhand smoke) hi, secondhand smoke chauh pawh nilo, thirdhand smoke a awm tawh a ni a ti a. Hei hi meizial khu puanah te leh banga a rim la chambang ang te hi a ni a ti a, a hlauhawm deuh deuh zawk a ni a ti. Sorkar pawhin meizuk pawizia hriain sum tam tak a seng a ni a ti.

Chief Minister chuan Mizote tluka zuk leh hmuam ti nasa khawvelah an vang hle a a rin thu sawiin, ringtu kan nih angin hnam hrisel ber niawm tak, hnam hrisello ber, cancer vei tamna ber kan ni te hi a pawi hle a ni a ti a. Intodelhna kawngah te, hriselna lamah te leh thianghlimna lamahte tan kan lak hle a ngai a ni a ti. Vaihlo leh a kaihhnawihte hi setana hmanrua a ni a, keini ringtu ten kan tih miah loh tur a ni a ti. Chief Minister chuan an sorkar hmasak lai atang tawha meizial zuk khap an kalpui tawh thu sawilangin, office ah mei zuk khap a, ashtray-te dahlan phal anih loh te sawiin, tunah Smoke free State ah kan puang ngam tawh a ni a ti.

Indian Society on Tobacco & Health, Mizoram Chapter President Pi Lal Riliani’n Blue Ribbon Campaign chungchangah thusawiin, midangte meizial khu lo hip luh hi chi hnih a then anih thu a sawi a. Midangte zuk khu hip luh hi meizial zutu ang chiaha tawrh thei a ni a ti a. Naupai leh naupang tan a pawi leh zual thei a ni a ti.Mizoramah mimal chenna inah meizial 95% zu an awm thu leh ina zuk phal 98% kan awm a ni a ti a. Mizoram chu smoke free state a puan anih tawh angin, meikhu pawlh loh boruak thianghlim neih i tum ang u tiin mi zawng zawng a sawm a ni.

Dr. Jane R Ralte, State Nodal Officer, MSTCS in powerpoint hmangin vaihlo in mihring hriselna a khawihpawi theihzia a hrilfiah bawk a ni.