Serchhip khawtlang tangrualin rualawh avanga an din Lal Thanhawla Higher Secondary School New Serchhip ami chu vawiin chawhnu dar 1:00 khan Education Minister Pu Lalsawta’n a hawng a, hemi hnu hian kum 2012 HSSLC Examination Result tha an neih lawmna inkhawm chu khuallian niin a hmanpui nghal a, Pu Lalthanzara Parliamentary Secretary chu Khual zahawm niin a hmanpui bawk.

Khuallian chuan result tha lawmna inkhawmah thu sawiin school tha tehna atan hian thiamsa awmkhawm hlawhtlintir a result tha tak neih nge thiam lo awmkhawm hlawhtlintir a result zahpuiawmloh tak neih hi? tih ngaihtuah tham tak a ni a ti a. Lal Thanhawla Higher Secondary school in an din tan kuma zirlai an duh ang pawh thlang hlei thei lo chunga 100% result an nei leh 50% lai First Division an nei chu thil chhinchhiah tlak tak a nih thu leh zirtirtute, zirlaite, nu leh pate leh a buaipuitu khawtlang tanrualna avang chauh lo chuan hetiang hlawhtlinna hi a awm theih loh thu a sawi a ni.

Pu Lalsawta chuan School hming hi ngaihtuahna mangkhawng hmang a put a ni lo tih khawtlang leh School Managing Board ten an hrilh chu a dik a rin thu a sawi a, hemi tichiang tura Managing Board member a Political Party hrang hrang aiawhte an tel ve chuan khawtlang tana thahnemngai leh zirna hmasawnna duh vanga tih a ni tih a lantir tiin Chief Minister hming puttir a nih avangin engmah tihsak an nih dawn loh thu leh an hnathawh leh result-in a phu a nih phawt chuan a phu na na na chu an duhsak dawn thu a sawi thung.

Khualzahawm Pu Lal Thanzara pawhin mitin hian kan nitin hna theuh hi Pathian rawngbawlna a ni tih kan pawm ngam chuan hlawhchhamna a awm dawn lo a ni tih sawiin Lal Thanhawla Higher Secondary School-a Principal leh a thawhpui ten chutiang rilru an put vanga lawm tlak result nei chu an ni tih a hriat thu a sawi a. Corruption pho ro tura mipui hmaa intiam ngam Chief Minister kan nei chu vanneih thlak a tih thu leh sawrkar hnathawk lian tak tak eiruk vanga an hna atanga ban, suspend leh chhui mek an tam tawh thu a sawi bawk. Hei bakah hian kan ban phak mai a world class education min chhawpchhuah saktu Education Minister chak tak leh thahnem ngai tak kan neih avanga rei lo teah Mizorama zirna in nasa taka hma a sawn belh ngei a rin thu a sawi bawk.

Lal Thanhawla Higher Secondary School hi Government Serchhip Higher Secondary School-a seat awmin zirlaite mamawh a phuhruk zawh tak loh avanga khawtlang tangrualin kum 2011 April thlaa an din a ni a, a tirah zirlai 45 neiin an zinga 10 chu HSSLC candidate an ni a, kum 2012 HSSLC exam ah khan pass vekin an zinga 5 in First Division an hmu a, 4 in second Division hmuin Third-ah 1 a awm bawk a ni.

Kum 2012 – 2013 academic session atan tun thlengin zirlai 109 an neih tawh a, department 10; History, Geography, Mizo, English, Home Science, Commerce, Education, Sociology, Public Administration leh Political Science te awmin faculty member 15 an awm mek a, kum 2013 – 2014 academic session atanga Science Stream hawng thei turin tan an la mek bawk a ni. Result lawmna inkhawmah hian Serchhip District Bawrhsap Pu P. Lalchhuanga bakah sawrkar pisa hrang hrang hotute leh zirna in hrang hrang hotute an tel kim hle a, tlaiah result lawmna ruai kil ho nghal a ni bawk.