Cancer Society of Mizoram hmalakna a sak leh enkawl tur, Cancer Khualbuk chu tukin khan Chief Minister Pu Lal Thanhawla chuan T.B.Tlang, Zemabawkah a hawng. He Khualbuk sak tak hi a lungphum Chief Minister hian ni 27 October 2009 khan alo phum tawh a ni.

Hawnna inkhawm khualbuk chhunga Cancer Society of Mizoram President Pu Laltlankima kaihhruaiah  Chief Minister chuan Zokhaw lam leh Aizawl khawpui  atangte a damlo, cancer vei laklawh tena an chhawr tur, khualbuk hawn theih a awm ta chu a sak theih nana thawhlawm thawhtu zawng zawngte chungah lawmthu a sawi a. Mizote hi ringtu kan nih angin midangte aia hrisel zawk awm tak; a hrisello ber, khawvela cancer vei tamna ber kan ni hi a lungchhiat thlak a, a chhuanawm loh hle a ni a ti a. Chuvangin  kan ei leh inah te insum a, zuk leh hmuama fihlim kan tum a tul a ni a ti  Kan Pathian Nungin 'In thianghlim tur a ni kei ka thianghlim si a' a tih angin thianghlim hi kan zir a ngai hle a ni a ti.

Chief Minister chuan ringtu kan nihna hi biakin mai nilo, kan hnathawhna leh kan thil tihna apiangah rim taka kan  hman chuan hnam hrisel, entawn tlak leh hnam changkang kan ni thei a ni a ti a. Kut tling lova sum lakluh duhna kan neite hi sim a ngai a, a chhelai siam tha turin kan zavaiin mawhphurhna kan nei a ni a ti.

Tun anga kan kal chho zel anih chuan Cancer Society of Mizoram hi damlote tan ala tangkai dawn chauh a ni Pu Hawla chuan a ti a. Midangte tana malsawmna ni chho zel turin Cancer Society of Mizoram chu duhsakna a hlan a. A tula an hman atan Pu Lal Thanhawla te nupa hian cheng nuai khat an pe bawk  a ni.

Tarlan tawh angin Khualbuk sakna hmun hi Health Department in hunbi neia Cancer Society of Mizoram hnena an hawh tir a ni a. A building hi Cement RCC a sak, Mizopa chhiara chhawng khat a ni a. A len zawng hi a dung feet 45, avang feet 35 leh verandah feet 12 a zau a ni a, in chung leh a hnuaiah hian bathroom/ ekin 4 ve ve a awm bawk a ni. A sak hna hi November 2009 atanga sa tanin kumin khan sak zawh a ni a, a senso zawng zawng hi Rs. nuai 31 leh sing 5 a ni. Heta thawhlawm thawhtu lian zual deuhte chu IOC Ltd in cheng nuai 3.5 , Selz' Foundation Chanmari in cheng nuai 15, Inhlawhna ah Rs. nuai 10 leh Lok Sabha MP Fund atangin Rs. nuai 5 te an ni. Building tharah hian damlote hman tur khum, mutbu leh bungrua dang ala awm lova, tlawmngaite tan a pek reng theih a ni.

Cancer Society of Mizoram hi kum 2001 July thla khan din tan a ni a, member ni duh tan Rs. 100 chawiin inziah luh theih reng a ni.

Chief Minister hi a nupui Pi Lal Riliani bakah bialtu MLA Pu R.Lalrinawma, Chairman, Mizoram Law Commission in an tawiawm a ni.