Co-operation Minister Pu J.H. Rothuama chuan, "Hun rei vak lovah Mizote hi mahni thar chhuah sangha ah kan la intodelh dawn a ni," a ti.
He thu hi Zofishfed ten Saikhawthlir ram, Raichhawk zau va sangha dil an enkawlna hmun kar kalta a a tlawh naa a sawi a ni. Mizoram Co-operative Fish Farming Marketing & Processing Federation (Zofishfed) te hian helai hmunah hian Fishery Department ram hawhin sangha dil an khuap a. Tunah hian uar takin sangha an khawi a. Cooperation Department atangin kumin hian tanpuina Rs. nuai 15 an dawng a. Nikum khan Rs. nuai 40 an lo dawng tawh bawk a ni.
Pu J.H. Rothuama chuan Zofishfed tena pawisa an dawn atanga an hnathawh dan kimchang Raichhawk zauvah hian a thlir kual a. An hnathawh chu tha hlea a hriat thu leh Zofishfed te chu Zoram tana thil chhenfakawm tak tur a taka thawk mektu an nih avanga a lawmthu a sawi a. Tun dinhmunah NLUP hnuaiah sangha dil siama eizawnna kalpui tum mi engemaw zat an awm bawk a, Mizoram chu hun reilo teah sangha thianghlim ei turah kan hnianghnar ngei ang a ti a ni. An hnathawhna hmun a fan zawha inkhawm tawite buatsaih ah heng thu te hi Minister chuan a sawi a. Aizawl Bazar-ah pawh Zo sangha englai pawha lei tur a awm ta hi Zofishfed te tan lakna pakhat nia a hriat thu pawh a sawi a ni.
Minister tawiawmtu Pu Lalpekliana, Addl. Registrar, Cooperation chuan Zofishfed ch Cooperative Society hrang hrang insuihkhawmna an nih avangin Federation an ni a. Sawrkar laipui chuan NGO te a tam thei ang puih leh Privatisational scheme hmanga puih hi a thil tum a ni a. Tuna Zofishfed te hmalakna hi Central sawrkar duhdan ang tak chu a ni, a ti a. Minister ho ngeia an pawl hmalakna leh an sum hmanna te an en ho thei chu lawmthu a sawi a ni.
Zofishfed Chairman Pu F. Lalnienga chuan an pawl nihphung sawiin Cooperation Department leh Fishery Department te enkawlna hnuaiah duang takin an thang tih a sawi a. Saikhawthlir a sangha dil hi kum 2009 tawp lam khan Fishery Department hnen atangin an hawh a. Nakkum khi chuan Sangha note an siam theih a rin thu sawiin Mizoram hi sangha dil uar taka la siam theihna tur leh tam tak thar chhuah an in beisei thu a sawi a ni.
Tun dinhmunah Zofishfed hian Saikhawthir, Zawlnuam, Darlak, Thenzawl, Tawipui, Phairuang, Chemphai ah te sangha dil an enkawl mek a. Heng hmun te hi kum 10 chhung atana luahhawh phawt an ni a. Zawlnuam leh Thenzawl ah te sangha chi an lo siam tawh a, uar zawka tih chhoh zel an tum a ni. Zofishfed hnuaiah hian society 40 an awm mek a ni.
Pu J.H. Rothuama hian amah zuitu Kolasib ASO II Pu Lalchungnunga chu Kolasib khawchhunga in hmun neilo te tana House site plan chungchang a sawi pui nghal a ni.
