Central Armed Police Forces (CAPF) Under 19 Football Talent Hunt Tournament, North East Zone ah Mizoram Mipa Team chu Champion niin Hmeichhe Team-in pathumna an hauh a; heng football thiam thalai te hlawhtlinna pualin vawiin khan Assam Rifles HQ 23 Sector, Mizorama he Tournament bultumtu te chuan a lawmna programme Loch Hall, Assam Rifles, Lammual-ah an buatsaih a, Chief Minister Pu Lal Thanhawla-in programme hi hmanpuiin, footballer te a fuih a ni. Programme hi Health Minister Pu Lal Thanzara, Mizoram Football Association (MFA) President pawhin hmanpuiin MFA hruaitu dangte leh Brig. MS Mokha, Commander, HQ 23 Sector Assam Rifles; Sector leh 46th Battalion Assam Rifles-a a thawhpui sipai officer dangte pawh an tel a ni.
Chief Minister Pu Lal Thanhawla chuan Mizote leh Assam Rifles hian inlaichinna tha neiin football leh infiamna dangte tihhmasawn nan nasa takin an lo thawk tawh thin thu a sawi a. Venhim hna an thawh mai bakah thalai te fuihna kawnga sports hmasawnna atana ke an pen hi an chhuanawm a, football than zelna atana tunhnaia an hmalaknate, hemi kawnga MFA an thawhpuina te leh U-19 team hlawhtling taka North East-a Champion ni tura an enkawlna hi a fakawm a ni, a ti.
Footballer te chu an hlawhltlinna hmuhah a lawmpui tih sawiin Chief Minister chuan Mizoram pawna inkhela an fehchhuahna apiang Mizoram leh Mizote palai ani ti hre renga an thil tih apiang chu ram leh hnam tan ti an ni tih leh Mizote darthlalang leh hmel lanna an ni tih te chu hre reng turin a chah a. Thalai te chu chhunglam leh pawn lam nun uluk a, thil tha lo laka insum a, mahni inthununa nei turin a fuih a. North East Zone-a Mizoram Mipa Under-19 Team in Manipur hneha an Champion chu an chhuanawm hle tih sawiin tun hmain Manipur hi kan hneh thei thin lova mahse vawiinah chuan India-a football thiam ber kan ni tawh a, football a kan talent leh theihna kan neih te hi ram pumin an hre tawh a, India mit kan fu tawh a ni, a ti.
Chief Minister chuan an hunlaiin chirh diak leh vaivut khu karah football leh hockey te Lammual ah ngei a khelh tawh thin thu te sawiin khang hun kha chuan infiamna ruhrel engmah kan nei lova, kan neih chu kan tumruhna a ni mai a, vawiinah chuan thalai infiammite tan infiamna ruhrel tha tak kan nei tawh a, in vannei hle a, he vanneihna hi hmang tangkai turin leh Mizoram ti hming tha zel turin in chhawr kan duh a ni, a ti. CAPF Under-19 Champion ni ngei turah Delhi ah an inkhelh zelnaah theihtawp chhuah tura fuihin hlawhtlinna an hmuh leh ngei thei nan duhsakna a hlan a ni.
Chief Minister Pu Lal Thanhawla leh Pu Lal Thanzara te hian Mipa leh Hmeichhe Team-a khel infiammi te hi medal leh lawmpuina certificate an hlan a ni.
MFA President Pu Lal Thanzara, MFA Honorary Secretary Pu Lalnghinglova Hmar leh Brig. Mokha te pawhin thu sawiin thalai te hi an fuih a ni.
CAPF Under 19 Football Talent Hunt Tournament hi thawhthum a khelh tura ruahman niin a thawh khatna leh thawhhnihna te chu zawhfel ni tawhin hengte Assam Rifles remruatna leh ruahmannaa buatsaih a ni a. A thawhkhatna atan Inter District Tournament neiin District 8 inkarah inelna neih a ni a, he Tournament atang hian North East Zone, CAPF Under -19 Football Talent Hunt Tournament-a Mizoram aiawh tur footballer thiam rual thlanchhuah an ni a, he inelna hi Shillong ah June ni 14 leh June ni 24 inkar khan buatsaih niin Mizoram Mipa Team chuan Manipur Team 2-1 in hnehin North East Zone ah an Champion a. A thawhthumna hi Delhi ah July 8 atanga khelh tura ruahman niin Mizoram Mipa Team hian Hmarchhak aiawhin Zone dangte an bitum dawn a ni.
