Vawiin chawhma khan New Secretariat Conference hall-ah Local Administration Department(LAD) leh SIRD tangkawp chuan Village Council(VC) leh Panchayati Raj Institution(PRI) khaikhinna, VC atanga PRI a inleh a tul em tih chungchangah te official, VC, Party hruaitute leh mipui aiawh te tan inrawnkhawmna leh zirchianna hun buatsaih a. He inrawnkhawmnaah hian LAD Minister Pu PC.Lalthanliana leh Pu K.Lalrinthanga, Parliamentary Secretary, LAD,etc., te pawh an tel a ni. 

LAD Minister Pu PC.Lalthanliana chuan inrawnkhawmna hunah hian thuhmahruai nei hmasa in LAD enkawlna hnuaia Village Council inrelbawlna kalphung chu her danglam leh khawvel thang zel mila siam that fo a ngai a ni tih a sawi a. India ram hmasawnna atana pawimawh leh democracy in a ken tel chu thuneihna insemzai a nih thu a tarlang a. Central sawrkar nena thawhdun a remchan zawk nan Mizoram sawrkar pawhin State Finance Commission, State Election Commission leh Women Seat Reservations a ti puitling tawh a, State in a thatpui dawn phawt chuan Mizoram sawrkar chuan VC atanga PRI a inleh rawtna pawh  zirchian leh tum a ni a ti a. Tunhnaiah, Mizoram sawrkar chuan central sawrkar chakzawka a thawhpui theih nan Department thenkhat hming pawh Cabinet Meeting thutlukna in tih danglam a rem ti tawh a ni a ti.  Pu K.Lalrinthanga, Parliamentary Secretary, LAD,etc pawh in 'Extended consultation Meeting on Conversion of Village Council Into Panchayati Raj institution"  neih a lo nih dan chungchang a sawi a. Sawrkarin mipui leh mithiam khawhawi zau zawk te rualawhna a hriatthiampui a ni tih tarlangin VC atanga PRI inthlak rawtna pawh, thil tih chi leh Mizoram in a mamawh thei dawn em tih uluk taka ngaihtuah ho a ngai a ni a ti. 

Vawiin a neih tak, "'Extended consultation Meeting on Conversion of Village Council Into Panchayati Raj institution"  hi Pu Rodney L.Ralte, Secretary, LAD in a kaihruai a. Sawihonna leh inrawnkhawmna neih hma hian   Pu Lallianchhunga, Asst. Professor, Mizoram University chuan VC leh PRI chungchang zirchianna a buatsaih tarlanna leh sawifiahna  hun a hmang a ni. 

VC leh PRI khaikhinna in a tarlan langsar deuh leh danglamna te chu : Term - kum 5 chhung ve ve nimahse VC term chu thla 18 chhung pawhsei theih a nih laiin PRI member te term chu pawh sei emaw pawh tawi theih dan a awm lova, term ral hma thla 6 chhunga inthlan buatsaih hman tur a ni thung. Ward/Bial- VC member te hi khawchhunga vote nei zawng zawng thlan an ni a, bye-election-ah pawh voter zawng zawngin an thlang leh a; PRI member te erawh chu khawchhungah dinna tur bik ward/bial nei an ni a, chumi chhunga voter chiah in an thlang a, bye-election ah pawh ward chhunga voter chiah in an thlang a, ward/bial chhunga mipuite tan PRI member chuan mawhphurhna a nei sang hle a  ni. Seat Reservation - VC ah kum 2014 atang khan hmeichiate tan seat hmun thuma thena hmun khat hauhsak an ni. PRI ah pawh hmeichiate tan seat hmun thuma thena hmun khat hauhsak an ni a. Seat reservation hi voter an tam dan a zirin SC/ST tan hauhsak leh theih a ni a; SC/ST tana hauhsak  lehchhawng seat hmun thuma thena hmun khat chu hmeichhiate tana hauhsak leh tur a ni. Sum Hnar - VC te hian ranchhiah an lak atanga sawrkar nen 50:50 a an insem te, thubuaia chaklo an Rs 500 thleng an chawitir te, VC Court a inlan lo te Rs 100 chin an chawitir, hnatlang phatna Rs.25 leh hnatlang awlrute  'runna' Rs.50 te hi an sum hmuh(own source) chu a ni tlang pui a. Gram Panchayat te thawhchhuah(own source) chu a tam thei hle thung. House/building tax, motor registration fee, bazar fee, dawr license fee leh user charge hrang hrang atang te in sum an la lut thei a ni.